Ўзбекистон президенти ва Вазирлар Маҳкамаси Тошкент халқаро аэропортини пойтахтдан ташқарига кўчириш имкониятларини муҳокама қилмоқда. Бу ҳақда Uzbekistan Airports бошқаруви раиси Раъно Жўраева Alter Ego лойиҳасига берган интервьюсида маълум қилди.
Апрель ойида компания раҳбари Шавкат Мирзиёевга Тошкент аэропорти янги фасадининг концептуал визуализациясини тақдим этган эди. Унинг сўзларига кўра, фасадни таъмирлаш йўловчилар оқимининг ўсиш суръатини сақлаб қолишга қаратилган.
«Ҳозирда Тошкентга йўловчилар оқими ўсиши суръатларини қўллаб-қувватлаш учун барча ишни қиляпмиз. Шу боис, жорий йил охиригача соатига 2400 йўловчига мўлжалланган терминални тезда қуришга мажбурмиз. Ягона фасадли, келиш ва кетишлар бир жойда бўлган, шунинг учун биз кейтерингни бошқа жойга ўтказамиз. Албатта, буларнинг барчаси бизга узоғи билан 2027 йилгача етарли бўлади», — деди у.
Унинг фикрича, аэропортнинг асосий «тор бўғзи» — учиш-қўниш йўлаклари.
«Ҳозирда [аэропортда] соатига 6−7 тагача ҳаво кемалари қўнмоқда. Прогнозларимизга кўра, 2025−2027 йилларда соатига 13 та ҳаво кемаси бўлади. Ва йўлаклар [қабулни] таъминлай олмай қолади. У ерда иккита йўлак бор, лекин [аслида] деярли битта. Улар яқин жойлашган, шунинг учун бир вақтдан фойдаланиб бўлмайди. Шунинг учун асосий чеклов ва „тор бўғиз“ — учиш-қўниш операциялари. Яна битта йўлакни қуриш учун ер участкасини топиш имконсиз, чунки шаҳар бор», — дея изоҳ берди у.
Раъно Жўраева 2035 йилгача мамлакат аэропортларини ривожлантириш стратегиясида шаҳардан 30 км узоқликда янги Тошкент аэропортини қуриш ва уни халқаро хаб сифатида ривожлантиришни таклиф қилган эди.
«Биз шундай вариантни таклиф қилдик. Ҳозирда бу давлат раҳбари ва Вазирлар Маҳкамаси томонидан янги аэропортни қуриш қанчалик мақсадга мувофиқ эканлиги муҳокама қилинмоқда», — деди у.
Uzbekistan Airports раҳбарининг фикрича, бу Ўзбекистоннинг аэропорт соҳасидаги истиқболлари учун жуда муҳим қадамдир.
«Чунки постсовет ҳудудида ва умуман Транс-Осиё йўналишида бундай марказ йўқ, тўрт полосали бўладиган аэропорт, трансфер трафигини ривожлантириш учун бепул инфратузилма йўқ. Бу мажбурий талаб. Агар бундай бўлмаса, ҳеч қандай авиакомпания ҳеч қаерга кўчмайди «, деди у.
Раъно Жўраева аэропортлар ҳам мамлакат экспорт салоҳиятидан деб билади.
«Чунки барча хорижий авиакомпаниялар ўз хизмати учун тўловни валютада қабул қилади. Шунинг учун биз айнан мамлакатнинг юқори технологияли экспорт салоҳиятини ривожлантиришимиз керак», — дея қайд этди Uzbekistan Airports раҳбари.
Узоқ истиқболда Тошкент аэропортини шаҳардан ташқарига кўчириш режаси тўғрисида 2020 йилнинг февралидаёқ маълум қилинган эди.
