Президент Шавкат Мирзиёев 11 апрель куни транспорт ва коммунал соҳалардаги лойиҳалар тақдимоти билан танишди, деб хабар берди унинг матбуот хизмати.
Тақдимот давомида мамлакат аэропортларини 2035 йилга қадар ривожлантириш стратегиясини амалга ошириш муҳокама қилинди, дастурнинг биринчи босқичи 2022−2026 йилларга мўлжалланган.
«Ўзбекистон24» телеканали репортажига кўра, стратегия аэропортларни, минтақавий иқтисодиётни ва ҳаво транспорти қатнови прогнозини батафсил ўрганишга асосланган.
Бунда аэропортларни ихтисослаштириш, жумладан, Тошкент аэропортини — халқаро хаб, Навоий аэропортини — юк ташиш хаби, Самарқанд ва Бухоро аэропортларини — туризм хабларига айлантириш кўзда тутилган.
Барча аэропортлар аэродром, терминал, юк ва ёқилғи қуйиш мажмуаларидан иборат.
«Жаҳон амалиётига мувофиқ ва хавфсизлик талаблари билан боғлиқ ҳолда — аэропорт мажмуаси устидан назоратни сақлаш керак», — дейилади тақдимотда.
Бундан ташқари, тақдимотда Фарғона водийси учун ягона аэропорт, янги Урганч аэропорти, Бухоро аэропортидаги янги терминал ва Тошкент аэропортининг янги фасадининг концептуал кўриниши намойиш этилди.
Бухоро аэропортининг янги терминали.
Урганч янги аэропорти.
Фарғона водийси учун янги ягона аэропорт.
Йиғилишда «Тошкент-Шарқий» аэропортининг бош режаси ҳам муҳокама қилинди. Унинг очилиши 2020 йилга мўлжалланган эди, бироқ, қурилиш ишлари ҳануз давом эттирилмоқда.
