9 июнь куни президент томонидан «Почта алоқаси тўғрисида»ги қонун имзоланди. Унга кўра, қонун билан қонунчиликка «посилка», «почта курьери» каби тушунчалар киритилди. Бу ҳақида Адлия вазирлиги матбуот хизмати хабар берди.
2020 йил 5 октябрь куни ўтказилган миллий почта тизимини ислоҳ қилиш масалалари бўйича видеоселектор йиғилишида президент томонидан почта соҳасидаги энг асосий вазифа одамларнинг оғирини енгил, узоғини яқин қилиш эканлиги таъкидланиб, жўнатмаларни қабул қилиш, саралаш ва онлайн кузатиш имконини берувчи автоматлашган ахборот тизимини ишга тушириш эканлиги белгилаб берилган эди.
Шу йил 18 январида эса «Почта алоқаси тўғрисида»ги қонун лойиҳаси иккинчи марта ўқилиб, қонун лойиҳасининг қабул қилиниши Ўзбекистонда 2021−2023 йилларда почта алоқаси соҳасини ривожлантириш бўйича «Йўл харитаси»ни ҳамда ратификация килинган 4 халқаро шартномалар доирасида почта алоқаси хизматларини кўрсатиш тизимини тубдан такомиллаштиришга хизмат килиши таъкидланган.
21 январда навбатдаги қонун лойиҳаси муҳокамаси жараёнида депутатлар қонун ташаббускори субъекти билан қонун матнида қўлланилган «курьер» ва «посилка» сўзлари ҳамда ушбу сўзлар ўрнида имкон қадар ўзбек адабий тилидаги муқобил сўзларини танлаш ва қўллаш масаласи бўйича ўзаро фикрлар алмашган эдилар.
Муҳокама сўнггида эса бугунги кун сўзлашув ва иш юритиш услубида «курьер» сўзи «почтальон» сўзига нисбатан кенгроқ қўлланилиши ва русча «Посылка» сўзининг фонетик товуш ўзгариш ҳодисаси натижасида ўзбек адабий тилида «посилка» тарзида қабул қилиниши инобатга олиниб, сўзларни қонун лойиҳаси матнида қолдириш мақсадга мувофиқ деб топилган.
Янги қабул қилинган ҳужжатда келтирилишича, почта хизматлари почта алоқаси операторлари ва провайдерлари томонидан почта, курьерлик хизматлари ҳамда бошқа турдаги почта хизматлари тарзида шартнома асосида кўрсатилади.
Қарорга кўра, фойдаланувчиларнинг манзилига оид маълумотлар, почта ва курьерлик жўнатмалари ҳамда уларнинг таркиби тўғрисидаги ахборот, почта алоқаси операторлари ҳамда провайдерларининг фаолияти соҳасига кирадиган бошқа хабарлар, шунингдек, ушбу почта ва курьерлик жўнатмаларининг ўзи почта алоқаси сирини ташкил этади.
Шунингдек, қарорга кўра:
- почта алоқаси операторлари ва провайдерлари почта хизматларини кўрсатиш бўйича мажбуриятларни бажармаганлик учун фойдаланувчиларга етказилган зарарларнинг ўрнини қоплайди;
- почта ва курьерлик жўнатмаси топширилмаганлиги, ўз вақтида етказиб берилмаганлиги ёки йўқотилганлиги, бузилганлиги (шикастланганлиги) ёхуд ўтказилган пул маблағлари тўланмаганлиги билан боғлиқ эътирозлар почта ва курьерлик жўнатмаси топширилган кундан эътиборан 6 ой ичида тақдим этилади;
- почта хизматларидан фойдаланувчилар почта алоқаси хизматларининг бошқа фойдаланувчиларига, почта алоқаси операторлари ёки провайдерларига етказилган, жўнатилиши тақиқланган предметлар ва моддаларни почта ва курьерлик жўнатмаларига жойлаш натижасида ёки улар лозим даражада ўралмаганлиги натижасида юзага келган зарар учун белгиланган тартибда жавобгар бўлади.
