Ўзбекистон президенти Шавкат Мирзиёев душанба куни кечқурун Тошкент ерусти ҳалқа метросининг иккинчи босқич қурилишини бориб кўрди, деб хабар берди президент матбуот хизмати.
«Дўстлик-2» (собиқ Чкалов бекати яқинида) ва Қўйлиқ станцияларини боғловчи узунлиги 11,5 кмлик 7 та станциядан иборат линиянинг биринчи қисми 2020 йил август ойида очилганди. Бу йўл 17 дақиқада босиб ўтилади. «Ўзбекистон 24» телеканали хабарига кўра, мазкур линия кунига 22 мингдан ортиқ йўловчига хизмат кўрсатади.
2020 йил декабрь ойида узунлиги 6,3 км бўлган 5 та бекатдан иборат Чилонзор йўлининг Сергели тармоғини ётқизиш ишлари ҳам якунланганди.
Ер усти ҳалқа метроси қурилиш лойиҳасининг иккинчи босқичида Қўйлиқдан Сергелига қадар бўлган йўналишни узайтириш кўзда тутилган. Лойиҳа қиймати 127,5 миллион долларни ташкил этади. Булар республика бюджети ва Ўзбекистон тикланиш ва тараққиёт жамғармаси маблағларидир.
Дастлаб, Қўйлиқдан Сергелининг «Қурувчилар» массивигача 5 та янги станциядан иборат, узунлиги 8,5 км бўлган, ер усти метро йўналиши қурилади. Поездлар станцияларда 15 сония туриши ҳисобга олинса, оралиқ 13 дақиқада босиб ўтилиши кутилмоқда, дейилади хабарда.
Айни пайтда 8 ва 12-бекатлар оралиғида 205 та таянч ва ригеллар ўрнатилиб, эстакадалар қурилиши давом этмоқда. Биринчи марта эгри бурчак қисмини қуришда (расмда) эстакадани ўрнатишнинг монолит усули қўлланилган. Қурилишга 1100 дан ортиқ мутахассислар, 75 дан ортиқ қурилиш техникаси ва механизмлар жалб этилган.
Тошкент транспорт бошқармаси бошлиғи Анвар Жўраев телеканалга берган интервюсида ҳалқа линиянинг 12-бекати («Қурувчи») ва Сергели йўналишининг 5-бекати («Қипчоқ») оралиғида электробусларда бепул қатнов йўлга қўйилиши режалаштирилаётганини маълум қилди.
Кейинчалик халқа линиясининг яна 2 та станциясини қуриш режалаштирилган ва иккинчи босқичнинг умумий узунлиги қарийб 12 кмга етади.
Янги йўналишда кунига 40 мингга яқин йўловчи ташиш режалаштирилган. Умуман олганда, йўналиш пойтахтнинг Яшнобод, Миробод, Сергели ва Янгихаёт туманларидаги 62 та маҳалла фуқаролар йиғинининг 244 минг нафар аҳолисини қамраб олиши керак.
Бундан ташқари, Тошкент вилояти туманларининг 428 минг нафар аҳолиси шаҳардаги керакли жойларга тез етиб бориш имкониятига эга бўлади, дейилади хабарда.
«Роҳат» бекати ҳудудида вилоят аҳолисига бошқа транспортдан метрога ўтиш имконини берувчи транспорт ўзгартириш узели ташкил этилиши режалаштирилган.
Қолаверса, пойтахт меҳмонлари ўз автомобилларини қолдириб, метро орқали шаҳардаги керакли манзилга етиб олишлари учун 6 та тўхташ жойи қуриш режалаштирилган.
Иккинчи босқич ишга туширилиши билан метрополитен линияларининг умумий узунлиги 70 кмга, станциялар сони эса 48 тага (яна 2 та бекат ишга туширилганда 50 тага) етади, дейилади хабарда. Ташиладиган йўловчилар сони 450 мингдан 600 мингга ошиши кутилмоқда.
Расмийлар бу шахсий транспорт воситаларидан фойдаланишни қисқартириб, пойтахт кўчаларида оқимни камайтиришини кутмоқда. Ҳисоб-китобларга кўра, «Қўйлиқ — Сергели» йўналишида ҳаракатланадиган кунлик автомобиллар сони 32 мингтагача қисқариб, транспорт оқими 12 фоиз камайиши мумкин, дейилади президент матбуот хизмати хабарида.
Тошкент давлат транспорт университети ректори Одил Абдураҳмонов «Ўзбекистон 24» телеканалига берган интервюсида, агар қатор чора-тадбирлар амалга оширилса, метрополитендаги йўловчилар оқимини кузгача 600 мингга (йил охиригача 800 мингга) етказиш мумкинлигини айтди. Университет мутахассислари 38 мингдан ортиқ респондентнинг фикрини ўрганиб, хорижлик экспертлар билан биргаликда тавсиялар ишлаб чиққан. Улар орасида қўшимча жамоат транспорти йўналишлари очиш ва уларни йўловчи кам метро бекатларига боғлаш, поездлар вагонини 5 та қилиш ва қатнов оралиғини қисқартириш, велошеринг станцияларини қуриш ва бошқалар мавжуд.
Одил Абдураҳмоновнинг қайд этишича, Тошкентга ҳар куни 9 та йўналишдан 800 мингдан ортиқ киши кириб келади. Иш тўғри ташкил этилса, шундан 167 минг кишини метрога йўналтириш мумкин, дейди ректор. Шаҳарга кириб келувчи енгил автомобиллар сони 97 мингтагача, магистрал кўчаларда тирбандлик 10 фоизгача камайиши мумкин. Тошкент вилоятидан пойтахтга 9 йўналишда экспресс-йўналиш автобус қатновини ташкил этиш таклиф қилинмоқда.
«Президент маҳаллалар аҳолисининг метрога келиб-кетиши учун қулайликлар яратиш, бекатлар ёнида авто ва велотураргоҳлар ташкил этиш муҳимлигини таъкидлади. Жамоат транспорти учун яна электробуслар олиб келиш ва уларга техник хизмат кўрсатувчи мутахассислар тайёрлаш, трамвай йўли қурилишини жадаллаштириш бўйича кўрсатмалар берди», — дейилади президент матбуот хизмати хабарида.
Шавкат Мирзиёев трамвай линияси қурилишини тезлаштириш бўйича ҳам топшириқ берди, дейилади хабарда. Лекин, президент матбуот хизмати ва «Ўзбекистон 24» телеканали бу борада батафсил маълумот бермаган.
Халқа метро линияси лойиҳаси 2017 йилда ишга туширилган (дастлаб шаҳар электр поездини қуриш режалаштирилган эди). Унинг умумий узунлиги 54,8 км бўлиб, жами 35 та станция қуриш режалаштирилган. Бу линияни бир неча босқичда — «Дўстлик» метро бекатидан «Қўйлиқ» бозоригача, сўнгра «Олмазор» — «Беруний» — «Бодомзор» — «Дўстлик» бекатларигача ётқизиш режалаштирилган эди. Лойиҳа вақти-вақти билан янгиланмоқда. Унинг якунланишининг аниқ муддати номаълум.
