Ерусти метро линиясидаги «Дўстлик 2 — Қўйлиқ» йўналиши ишга тушди, дея хабар берди Транспорт вазирлигининг матбуот хизмати.
«Тошкент метрополитенининг янги ерусти халқа йўлининг „Дўстлик-2“ бекатидан „Қўйлиқ“ бекатигача ҳаракат 30.08.20 йил соат 06:00 дан йўлга қўйилди», — дейилади хабарда.
Шу ўринда қайд этилишича, «Дўстлик» бекатидан «Дўстлик-2» бекатига ўтиш бепул.
Маълумот учун, «Дўстлик-2» бекатидан «Қўйлиқ» бекатигача бўлган мазкур йўналиш узунлиги 11 километр бўлиб, 7 та бекат барпо этилган. Биринчи бекатдан охиргисигача 19 дақиқада етиб олиш мумкин. Бу масофада ҳар бири 4 та вагондан иборат 4 та поезд қатнайди. Ушбу йўналиш кунига 46 минг йўловчига хизмат кўрсатиш имкониятига эга.
Эслатиб ўтамиз, 29 август куни Тошкент ерусти ҳалқа метросининг биринчи босқичи ишга тушгани ҳақида хабар бергандик. Унда президент Шавкат Мирзиёев бу ерга ташриф буюриб, жамоатчилик билан бирга поездда юрди.
Шунингдек, «Қўйлиқ» бекатида ерусти ҳалқа метросининг кейинги босқичлар қурилиши бўйича тақдимот ўтказилганди. Унга кўра, ушбу лойиҳанинг умумий қиймати 422 миллион доллардан зиёд бўлиб, бешта босқичда амалга оширилиши режалаштирилган. Иккинчи босқичда Қўйлиқ бозори билан Тошкент ерости метросининг «Олмазор» бекати боғланади. Учинчи бўлиб «Беруний», ундан кейин «Бодомзор» бекатигача бўлган қисм қурилади. Сўнгги босқичда эса ҳалқа метро линияси яна «Дўстлик» бекатига уланади. Бу йўлларнинг жами узунлиги қарийб 55 километр, бекатлар 35 та бўлади.
