Самарқандда қозоғистонлик сайёҳларга нисбатан куч ишлатган икки нафар ички ишлар ходими ишдан бўшатилди, деб хабар берди ЎзА.
Прокуратура уларга нисбатан Жиноят кодексининг 206-моддаси 1-қисми (Ҳокимият ёки мансаб ваколати доирасидан четга чиқиш) билан жиноят ишини қўзғатган.
Эслатиб ўтамиз, 21 майга ўтар кечаси Самарқанд ИИБ Патруль-пост хизмати ходимлари бир неча сайёҳни, жумладан, Қозоғистондан келган фуқарони тўхтатиб, уларнинг ёнида ҳужжатлари бўлишига қарамасдан электрошокерларни қўллаган ҳолда мажбуран ички ишлар бўлимига шахсни тасдиқлаш учун олиб кетишганди.
Ходимлар сайёҳларга шаҳарда «Хавфсиз тун» тадбири ўтказилаётгани учун соат 23:00 дан кейин кўчада бўлиш тақиқлангани ва уларда «режа» борлигини айтишган. Сайёҳлар ҳужжатларини тақдим этиб, таксида кетишга рухсат беришларини сўраган.
Хабар тарқалганидан сўнг, Ички ишлар вазирлиги Самарқанд шаҳар ИИБ Патруль-пост хизмати ходимлари хизмат вазифасини ва махсус-техник воситаларни қўллаш ваколатини суиистеъмол қилганини маълум қилди.
