26 апрел куни Қашқадарёнинг Чироқчи туманида ўз фаолиятини олиб бораётган ЙПХ ходимларига қаршилик кўрсатган фуқароларга жиноят иши очилди. Бу ҳақда Қашқадарё вилоят ИИБ ахборот хизмати хабар берди.
Қайд этилишича, ИИБ ЙҲХБ ЙПХ инспекторлари туман марказидаги «Озиқ-овқат деҳқон» МЧЖ бозори атрофида жамоат тартибини сақлаш ҳамда автомашиналар тирбандлигини олдини олиш мақсадида патруль махсус автомашинаси овоз кучайтиргич мосламаси билан хизмат олиб борган.
Шу куни тахминан 17:30ларда фуқаролар хизмат вазифасини бажараётган ходимларнинг қонуний талабига бўйсунмасдан фаол қаршилик кўрсатган. Улардан бири патруль автомашинасининг олд ўриндиғида бўлган ЙПХ катта инспектори Б.Каримов хизмат кийимининг погони, бодикамераси ва кўкрак нишонини юлиб олган.
ИИБ хабарига кўра, ушбу вазиятда ходимлар қўшимча кучлар чақиртириб, жамоат тартибини тиклаган.
Талабга бўйсунмасдан, фаол қаршилик кўрсатган 4 кишига Чироқчи туман прокуратураси Жиноят кодексининг 219-моддаси 2-қисми (Ҳокимият вакилига ёки фуқаровий бурчини бажараётган шахсга қаршилик кўрсатиш) билан жиноят иши қўзғатди.
Гумон қилинувчиларнинг уч нафари эса ЖПКнинг 221-моддаси тартибида ушланди. Дастлабки тергов ҳаракатлари кетмоқда.
