Ташқи ишлар вазирлигида Финляндиянинг Ўзбекистонда янги тайинланган элчиси (қароргоҳи Хельсинкида) Илкка Ряйсянен (Ilkka Räisänen) билан видеоконференция шаклида учрашув бўлиб ўтди. Бу ҳақда «Дунё» ахборот агентлиги хабар берди.
Музокаралар давомида элчининг ишонч ёрлиқларини тақдим этиш учун Тошкентга ташрифини ташкил этиш, шунингдек, Ўзбекистон-Финляндия ҳамкорлигини янада кенгайтириш бўйича аниқ вазифалар муҳокама қилинган.
Жорий йилда Тошкентда сиёсий маслаҳатлашувларнинг мунтазам раундларини ва савдо-иқтисодий, илмий-техникавий ҳамкорлик бўйича Ҳукуматлараро комиссия йиғилишини ўтказиш, шунингдек, Марказий Осиё мамлакатлари билан ҳамкорлик бўйича Финляндия парламентлараро гуруҳи раҳбари Киммо Кильюнен бошчилигидаги делегациясининг 2022 йил август ойида Ўзбекистонга ташрифини биргаликда тайёрлашга келишиб олинган.
61 ёшли дипломат Илкка Рäисäнен тайинловга қадар Финляндия Ташқи ишлар вазирлиги департаменти бош директори маслаҳатчиси лавозимида ишлаган.
У 2018−2021 йилларда қароргоҳи Хельсинкида жойлашган Финляндиянинг Ўзбекистондаги дипломатик миссиясини бошқарган Мария Лииваланинг ўрнини эгаллади. Лиивала ҳозирда Финляндия Ташқи ишлар вазирлигининг Россия, Шарқий Европа ва Марказий Осиё бўйича департаменти бош директори лавозимида ишламоқда.
Эслатиб ўтамиз, 26 февраль куни Ўзбекистон ва Финляндия ўртасида дипломатик муносабатлар ўрнатилганига 30 йил тўлди.
