«Даврбанк» томонидан фуқароларнинг банк карталаридан маблағларни қонунга зид равишда ечиб олиш амалиёти йўлга қўйилгани аниқланди, дея хабар қилди Ўзбекистон Марказий банки (МБ) матбуот хизмати.
МБнинг аниқлик киритишича, бундай ҳолатда кафил ёки биргаликда қарз олувчи ҳисобланмаган фуқароларнинг банк карталари қонун ҳужжатларига риоя қилинмаган ҳолда уларнинг розилигисиз тижорат банки томонидан жисмоний шахсларга ажратилган кредит қарздорлигини сўндириш учун бириктириб қўйилган ва маблағлар уларнинг рухсатисиз ечиб олинган.
«Бундай амалиётни йўлга қўйган «Даврбанк"ка нисбатан белгиланган тартибда жарима санкцияси қўлланилди. Шунингдек, банкка фуқароларнинг банк ҳисобварақларидан (шу жумладан, банк карталаридан) маблағларни қонунчиликка зид равишда уларнинг розилигисиз ҳисобдан чиқариш амалиётига чек қўйиш ҳамда фуқаролардан шу мазмунда шикоятлар келиб тушганда, ушбу маблағларнинг қайтариб берилишини таъминлаш вазифалари юклатилди», — дейилади МБ хабарида.
Шунингдек, банк хизматлари истеъмолчиларининг ҳуқуқларини ҳимоя қилиш хизмати тижорат банкларини кредит қарздорликларни учинчи шахслар ҳисобидан сўндиришда амалдаги қонун ҳужжатлари талабларига риоя қилишга чақирган.
