Ўтган ҳафтада Франция ҳукумати россиялик миллиардер Алишер Усмонов билан боғлиқ бўлган иккита вертолётни Cote d’Azur соҳилида ҳибсга олди, деб хабар бермоқда Forbes.
Нашрнинг Франция иқтисодиёт ва молия вазирлиги вакилига таяниб маълум қилишича, Ле-Кастелледаги Airbus EC-175 (борт рақами M-DLBR) ҳамда Монте-Карлодаги Eurocopter EC-155 (M-DLBA) вертолётларига мулк ҳуқуқи чекланди.
Очиқ маълумотларга кўра, Airbus EC-175 сўнгги бор 2021 йилнинг 13 ноябрида Ле-Кастелледа, Eurocopter EC-155 эса — Монте-Карлода қайд этилган. Ҳар икки вертолёт Буюк Британиянинг Мэн оролчасида рўйхатга олинган, бироқ, уларни уч марта рўйхатдан чиқаришган. Бу вертолётлар бошқа бирор мамлакатда рўйхатдан ўтмагунича ва суғурта қилинмагунча сертификатдан маҳрум қилиниши ҳамда уча олмаслигини англатади.
Forbes маълумотларига кўра, Airbus EC-175 Crystal Sky Limited компаниясига, Eurocopter EC-155 бўлса — Margaux Aviation Limited компаниясига тегишли. Ҳар икки компания Кайман оролларида жойлашган. Нашр икки вертолёт нархини янги ва ишлатилган моделлар билан солиштирган ҳолда 26 млр доллар миқдорида баҳолаган.
Алишер Усмонов вакилининг Forbes`га маълум қилишича, тадбиркор ушбу вертолётларга эгалик қилмайди.
«[Forbes тилга олган] мулкнинг катта қисми, жумладан икки вертолёт қайтариб бўлмайдиган трастларга ўтказилган. Жаноб Усмонов уларга эгалик қилмайди. Мулкларнинг оилавий трастларга ўтказилиши кўп йиллар илгари бошланган ва бу санкциялардан қочиш ёки бойликни яширишга ҳеч қандай алоқаси йўқ», — деди у.
28 феврал куни Европа Иттифоқи санкциялар рўйхатига Алишер Усмоновни киритди. Монако ҳам Россияга қарши кўпчилик Европа давлатларидаги каби бир хил иқтисодий санкцияларни жорий этди ва активларни музлатиш жараёнини ишга туширди.
Аввалроқ, Италиянинг Сардиния оролида россиялик олигарх Алишер Усмоновнинг мол-мулклари мусодара қилинганди. Жумладан, тадбиркор 17 млн евролик вилласи ва 66 млн евролик активлари бўлган олтита компаниясидан айрилган. Шуниндек, пулемёт ва қўл гранаталари ҳужумларига бардошли қиймати 600 минг доллардан зиёд Mercedes Maybach S650 Guard VR10 автомобили ҳам олиб қўйилгани айтилганди. Март ойи бошларида тадбиркорнинг дунёдаги энг йирикларидан бири ҳисобланган Dilbar номли 600 млн долларлик супер яхтаси ҳамда Россиядаги энг йирик самолётлардан бири деб қаралган хусусий самолёти АҚШда америкалик шахслар томонидан фойдаланиш учун блокланганди.
