Ўзбекистон ва Туркия республикаларида ваколатли органлар томонидан берилган COVID-19 вирусига қарши эмланганликни тасдиқловчи расмий сертификатлар ўзаро тан олинади.
Санитария-эпидемиологик осойишталик ва жамоат саломатлиги хизматининг хабар беришича, бу борада Ўзбекистон ва Туркия ҳукуматлари ўзаро келишувга эришган:
- Томонлар давлатларнинг ваколатли органлар томонидан берилган COVID-19 вирусига қарши эмланганликни тасдиқловчи расмий сертификатларни ўзаро тан олади;
- Томонлар эмланганлик тўғрисидаги сертификат эгасига, томонлар давлатларининг ҳудудига COVID-19 вируси тарқалишини олдини олишга қаратилган чекловларсиз киришни кафолатлайди;
- Миллий даражада ёки ЖССТ томонидан тасдиқланган вакциналар билан тўлиқ эмланган икки мамлакатдан келган саёхатчилар, агар эмлаш тегишли ваколатли органлар томонидан тасдиқланган бўлса, ўз мамлакатларига киришда ушбу қоидалардан фойдаланади.
Эслатиб ўтамиз, 15 мартдан бошлаб Тожикистон ҳукумати МДҲ давлатлари, шу жумладан Ўзбекистон томонидан берилган коронавирусга қарши эмланганлик тўғрисидаги сертификатларни расман тан олишни бошлаши ҳақида ёзган эдик.
Бундан ташқари, Буюк Британия 10 январдан бошлаб Ўзбекистоннинг коронавирусга қарши эмланганлик тўғрисидаги сертификатларини расман тан олишни бошлаган эди.
