Самарқанд шаҳрида ички ишлар ходимлари вилоятлараро йўналишларни ноқонуний йўл билан эгаллаб олган яна бир гуруҳ шахсларни қўлга олди, деб хабар бермоқдаСамарқанд ИИБ матбуот хизмати.
Хабарда таъкидланишича, «Самарқанд-Навоий» йўналишдаги автошоҳбекатни зўравонлик билан эгаллаб олганликда гумонланаётган бир гуруҳ спортчилар қўлга олинган.
«Самарқанд шаҳрида яшовчи бир гуруҳ спортчилар „Самарқанд-Навоий“ йўналишдаги автошоҳбекатни зўравонлик ва ўзбошимчалик билан ноқонуний равишда эгаллаб олиб, ҳайдовичлардан ушбу йўналишга кириш учун пул талаб қилиб келишган», — дейилади хабарда.
ИИБга кўра, спортчилар «Самарқанд-Навоий» йўналишига кириш учун ҳайдовчилардан 500 доллардан, кунлик қатновчи ҳайдовчилардан эса 50 минг сўмдан пулларни товламачилик йўли билан олиб келганликда гумонланмоқда.
Ўзбекистон ИИВ ЖҚББ, ДХХ, Прокуратура ҳамда вилоят ИИБ ЖҚБ Уюшган жиноятчиликка қарши кураш бўлими ходимлари ҳамкорлигида тезкор тадбир ўтказилиб, ушбу фаолият билан шуғулланиб келаётган 7 нафар шахслар қўлга олиниб, уларнинг жиноий фаолиятига чек қўйилган.
Самарқанд шаҳар «Гала Осиё» маҳалласида яшовчи 1985 йилда туғилган Ш. Д. ушбу жиноий гуруҳга етакчилик қилгани айтилмоқда.
Мазкур ҳолат юзасидан Самарқанд шаҳри бўйича ИИО ФМБ ҳузуридаги ТБ томонидан Ш. Д. ва бошқа шахсларга нисбатан Жиноят кодексининг 165-моддаси (товламачилик) 2-қисми билан жиноят иши қўзғатилиб, тергов ҳаракатлари олиб борилмоқда.
Сал аввал Самарқанд ИИБ муқаддам жиноий жавобгарликка тортилган 7 нафар шахс «Самарқанд-Навоий» ва «Самарқанд-Бухоро» йўналишида қатновчи ҳайдовчилардан зўравонлик ва товламачилик йўли билан пул тама қилиб келгани ҳақида хабар берган эди. Гуруҳ аъзоларининг фаолиятига қарши чиққан ёки сўралган пул маблағларини бермаган ҳайдовчиларга гуруҳ томонидан ёлланган бир гуруҳ уюшган спортчилар томонидан жисмоний тазйиқ, зўравонлик ва оғир турдаги тан жароҳатлари етказилгани айтилганди.
