Адлия вазирлиги томонидан Ўзбекистон тентпеггинг федерацияси давлат рўйхатидан ўтказилди, дея хабар қилди вазирлик ахборот хизмати.
«Ушбу ташкилотнинг асосий мақсади тентпеггинг спорт турини ривожлантириш ва оммалаштириш, спорт орқали аҳоли, айниқса ёшларни спортга, соғлом турмуш тарзига бўлган қизиқишларини ошириш, тентпеггинг ҳамда бошқа турдош спорт турлари бўйича маданий-маърифий, жисмоний тарбия-соғломлаштириш ва спорт тадбирларини ўтказиш, халқаро спорт алоқаларини кенгайтириш ҳамда ўз аъзоларининг ҳуқуқлари ва қонуний манфаатларини ифодалаш ва ҳимоя қилишдан иборат», — дейилади хабарда.
Тентпеггинг — қадим замонлардан бери маълум бўлган спорт тури бўлиб, Халқаро от спорти федерацияси томонидан тан олинган ўнта йўналишдан биридир. Ушбу спорт турида от чоптириб кетаётган чавандоз қўлидаги найза ёки қилични ердаги кичик буюмга (расмий номи «чодир қозиғи», инглиз тилида tent peg) санчиб, уни қуролнинг учига илиб олиши керак.
1982 йилда тентпеггинг Осиё Олимпия кенгаши, 2002 йилда эса Халқаро от спорти федерацияси томонидан тан олинган. Бугунги кунда ушбу спорт тури Буюк Британия, Австралия ва Жанубий Африкада нисбатан кенг тарқалган, лекин айниқса шарқий мамлакатларда — Ҳиндистон, Покистон, Уммон ва Исроилда машҳур.
