ДХХ «Ислом Давлати» халқаро террористик ташкилоти (ИШИД) сафида жанговар ҳаракатларда иштирок этганликда гумон қилинаётган фуқарони Ўзбекистонга олиб келди. Бу ҳақда ЎзА хабар бермоқда.
Хива шаҳрида туғилган фуқаро Д.У. ўғли Д.Х. билан бирга 2009−2015 йилларда Россияга меҳнат мигранти сифатида ишлашга кетган. Бу даврда ижтимоий тармоқлар орқали халқаро террористик ташкилотлар аъзоларининг таъсирига тушиб қолган.
Натижада, 2015 йилда Тожикистоннинг сохта паспортини расмийлаштириб, Туркия орқали Сурия давлатига борган. У ерда «Ислом Давлати» халқаро террористик ташкилоти аъзолари сафига қўшилиб, жанговор ҳаракатларда иштирок этишган. Кейинроқ Д.У. Суриядан МДҲ давлатларидан бирига қўпорувчилик ҳаракатларини амалга ошириш мақсадида қайтиб келган.
ДХХ ходимларининг хорижий ҳамкорлар билан биргаликда олиб борган тезкор-қидирув тадбирлари натижасида Д.У. Ўзбекистонга олиб келинган.
Маълум қилинишича, у қўлга олиш вақтида фаол қаршилик кўрсатган. Кейинги жараёнларда ҳам у ўзининг «жиҳод» қилиш борасидаги қарашларидан воз кечмаганини айтган.
Ҳозирда унинг ўғлига нисбатан қидирув эълон қилинган.
