«Пекин-2022» Қишки олимпиада ўйинларида Ўзбекистондан ягона вакил бўлган Комилжон Тўхтаев 13 февраль куни Тоғ чанғиси спорт турининг «Гигант слалом» йўналишида иштирок этиб 29-ўринни эгаллади.
Мазкур йўналишни у 2 уринишда натижасига кўра, 2:27.49 сонияда якунлади. 
Фото: Beijing2022.cn
Медалларга швейцариялик Марко Одерматт (2:09.35 сония — олтин). словакиялик Зан Кранжеч (2:09.54 — кумуш), ҳамда франциялик Матью Фаивр (2:10.69 — бронза) эга чиқди.
Спортчи эса мазкур майдондаги сунъий қорни ва ўзининг уринишини қуйидагича изоҳлади:
«Осон бўлмади. Бундан ҳам яхши бўлиши мумкин эди. Биринчи уриниш омадсиз бўлди. Иккинчиси эса аниқроқ. Об-ҳаво ҳам яхши. Фақат муз ва қор ноодатий эди. Қаерда тезлашиш керак, қаерда тўғри бориш кераклигини билмай қоласан. Тўғри кетсанг, қальтираш бошланади. Шундай ноодатий қор экан. Трассани ҳис қилиш қийин эди», — деган у.
Хронология:
1-уринишни Комилжон 60-бўлиб якунлади. Унда Комилжон Тўхтаев 35-натижани қайд этди. У вертикал узунлиги 424 метр бўлган трассага 1:12.77 сонияда етиб келди.
1-машқ доирасида етакчилар сафидан қуйидаги спортчилар етиб келган:
- 1-ўрин — Одерматт Марко (Швейцария) 1:02.93 сония;
- 2-ўрин — Бреннстеинер Стефан (Австрия) 1:02.97 сония;
- 3-ўрин — Фаивр Матью (Франция) 1:03.01 сония.
2-уринишда эса Комилжон Тўхтаев 29-ўринни эгаллади. Мазкур уринишда у 1:14.72 натижани қайд этди. Умумий ҳисобда у 2 машқ натижаларига кўра, 2:27.49 сонияда маррага етиб келди.
2-машқ доирасида эса етакчилар сафида қуйидаги спортчилар ўрин олган:
- 1-ўрин — Кранзец Зан (Словакия) 1:05.83 сония;
- 2-ўрин — Одерматт Марко (Швейцария) 1:06.42 сония;
- 3-ўрин -Верду Жоан (Андорра) 1:06.80 сония.
Мазкур натижа орқали Комилжон Тўхтаев ўз шахсий рекордини янгилади. 2018 йилда ўтган Олимпия ўйинларида у 52-ўринни эгаллаганди.
Маълумот учун, энди у 16 февраль куни слалом баҳсларида қатнашади.
Аввалроқ, Комилжон Тўхтаев 2022 йилги Олимпиада йўлланмасини олиши жуда қийин бўлганини айтган эди.
