20 декабрь куни Тошкент ёшлар форуми доирасида адлия вазири Русланбек Давлетов ёшлар билан мулоқот чоғида тотализаторларни блоклаш ҳақидаги саволга жавоб берди.
«Соҳа вакиллари айта олади буни, техник томондан чегаралаш, блоклаш имкони бўлса керак. Чунки у ерда пул билан боғлиқ бўлган нарсалар бор, пул ўтказилади, „ставка“ қўйилади. Бугунги кунда тарбияга бу жуда қаттиқ таъсир қилаяпти. Бу соҳани ўрганганмиз, рухсат берган давлатлар бор, чеклагани бор, умуман тақиқлаганлари бор», — деди у.
Вазирнинг сўзларига кўра, «ривожланган давлатларда шу соҳага психология хизматларини киритган, одамлар қиморга жуда берилиб кетган бўлса, уларга аноним курсларда ёрдам кўрсатилади».
«Бу [тотализатор] тўғрисида ишлаш керак, бу давлатнинг мажбурияти. Чунки аҳоли ҳар хил йўлларга кириб кетишининг олдини олиш учун ҳам тегишли давлат органлари ишлаши керак», — деди Русланбек Давлетов.
У Лос Анжелесда ўқиган пайтларида қиморнинг қанчалик даҳшатли нарса эканлигининг гувоҳи бўлганини сўзлаб берди.
«Тақиқлаш нуқтаи назаридан ҳозир инсон сифатидаги фикрим билан адлия вазири сифатида фикрим аралашиб кетиб қолади. Лекин аралашса ҳам айтаман, мен ҳам буни тарафдори эмасман. Ëшлигимда Америкага бориб ўқиганимда кўрганман, Лос Анжелесда коллежда ўқиган пайтимизда даҳшатли нарса эканлигини кўрдим. Тотализатор уни ўйнаётган одамга эмас, ҳаммаёққа таъсир қилади, атроф-муҳитга таъсир қилади», — деди у.
«Бу индустрия, у қадриятлар бизга тўғри келмайди. Шунинг учун албатта бу борада давлат бошқаруви жуда қаттиқ бўлиши керак. Менинг фикрим шу», — дея якунлади сўзини адлия вазири.
Эслатиб ўтамиз, президент фармонига кўра, 2021 йил 1 январидан бошлаб Ўзбекистонда букмекерлик фаолиятини лицензия билан амалга оширишга рухсат берилганди. Июль охирларида Истеъмолчилар ҳуқуқларини ҳимоя қилиш агентлиги мамлакат ҳудудида букмекерлик ва тотализатор фаолиятини амалга ошириш учун ҳеч кимга лицензия берилмаганини ва ушбу фаолиятлар ҳали ҳам қонуний эмаслигини эслатди.
8 сентябрда ХДП фракциясининг навбатдаги йиғилишида бир қатор қонунларга букмекерлик фаолиятини амалга ошириш механизмларини назарда тутувчи нормалар киритиш таклиф этилди.
14 сентябрда эса қуйи палата аъзоси Дониёр Ғаниев фақатгина Ўзбекистон резидентларига букмекерлик билан шуғулланишга рухсат беришни таклиф қилди. Депутат норезидент букмекерларга Ўзбекистон банк тизимидан тўловлар амалга оширилишини тақиқлаш кераклигини ҳам айтди. Шунингдек, у тотализаторларни реклама ва тарғибот қилишга рухсат бермаслик ҳамда жисмоний шахслар учун «ставка"ларнинг максимум чегарасини белгилаш таклифини илгари сурди.
29 сентябрда Истеъмолчилар ҳуқуқларини ҳимоя қилиш агентлиги АОКА билан биргаликда 10 дан ортиқ букмекерлик фаолияти билан шуғулланувчи ноқонуний сайтларга киришни чеклади.
