Қонунчилик палатасида Халқ демократик партияси фракциясининг навбатдаги йиғилишида букмекерлик фаолиятини ҳуқуқий тартибга солиш масаласи муҳокама қилинди. Бу ҳақда партия ахборот хизмати хабар берди.
Қайд этилишича, қонунчилик муаммолари ва парламент тадқиқотлари институти томонидан букмекерлик фаолиятини қонун жиҳатдан тартибга солиш тўғрисидаги масала ўрганиб чиқилган.
Таҳлиллар давомида букмекерлик фаолиятини амалга ошириш механизмлари, хусусан, фаолият юритиш талаблари, рухсат бериш тартиб-таомиллари, букмекерлик фаолиятини амалга оширишдаги чекловлар ижтимоий муносабатлар қонун билан тартибга солинмаганлиги аниқланган.
Маълум қилинишича, «Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида«ги қонун лойиҳасини тайёрлаш ҳамда лойиҳага кўра баъзи қонунларига, хусусан, Фуқаролик кодекси, Жиноят кодекси, Маъмурий жавобгарлик тўғрисидаги кодекс, Солиқ кодекси ва бошқа қонунларга букмекерлик фаолиятини амалга ошириш механизмлари, хусусан, фаолият юритиш талаблари, рухсат бериш тартиб-таомиллари, букмекерлик фаолиятини амалга оширишдаги чекловлар назарда тутувчи нормаларни киритиш таклиф этилмоқда.
Таъкидланишича, ушбу ташаббусни амалга ошириш орқали букмекерлик соҳасидаги ижтимоий муносабатларни ҳуқуқий жиҳатдан тартибга солишга эришилади.
«Розилик берилган тақдирда, институт ҳамда масъул вазирлик ва идоралар вакилларидан иборат ишчи гуруҳ тузилади ва тегишли қонун лойиҳаси тайёрланади», — дейилади хабарда.
Маълумот учун, президент фармонига кўра, 2021 йил 1 январдан бошлаб Ўзбекистонда букмекерлик фаолиятини лицензия билан амалга оширишга рухсат берилган.
Аввалроқ «Газета.uz» бугунга қадар мамлакат ҳудудида букмекерлик ва тотализатор фаолиятини амалга ошириш учун ҳеч кимга лицензия берилмагани ҳақида ёзган эди.
