Ўзбекистонда 10 дан ортиқ букмекерлик хизматларини кўрсатувчи веб-сайтлари блокланди, дея хабар бермоқда Истеъмолчилар ҳуқуқларини ҳимоя қилиш агентлиги ахборот хизмати.
Қайд этилишича, ўтган давр мобайнида агентлик АОКА билан биргаликда 10 дан ортиқ букмекерлик фаолияти билан шуғулланувчи ноқонуний сайтларга киришни чеклаган. Бу соҳадаги ишлар давом этмоқда.
Шунингдек, Истеъмолчилар ҳуқуқларини ҳимоя қилиш агентлиги букмекерлик фаолияти ҳамон ноқонуний эканлигини эслатди.
Маълумот учун, президент фармонига кўра, 2021 йил 1 январдан бошлаб Ўзбекистонда букмекерлик фаолиятини лицензия билан амалга оширишга рухсат берилган.
Аввалроқ «Газета.uz» бугунга қадар мамлакат ҳудудида букмекерлик ва тотализатор фаолиятини амалга ошириш учун ҳеч кимга лицензия берилмагани ҳақида ёзган эди.
Эслатиб ўтамиз, ХДП фракциясининг йиғилишида ҳам букмекерлик фаолиятини ҳуқуқий тартибга солиш масаласи муҳокама қилинган эди. Бир қатор қонунларга букмекерлик фаолиятини амалга ошириш механизмларини назарда тутувчи нормалар киритиш таклиф этилган эди.
Кейинроқ Қонунчилик палатаси аъзоси Дониёр Ғаниев фақатгина Ўзбекистон резидентларига букмекерлик билан шуғулланишга рухсат беришни таклиф қилаётгани ҳақида хабар берилган эди. Депутат норезидент букмекерларга Ўзбекистон банк тизимидан тўловлар амалга оширилишини тақиқлаш кераклигини ҳам айтган. Шунингдек, у тотализаторларни реклама ва тарғибот қилишга рухсат бермаслик ҳамда жисмоний шахслар учун «ставка"ларнинг максимум чегарасини белгилаш таклифини илгари сурган.
