Тошкент шаҳрида оғир атлетика бўйича катталар ўртасида жаҳон чемпионати ўтказилмоқда. Мусобақада 16 декабрь куни икки рақобатчи ўзбекистонлик оғир атлетикачи — Руслан Нурудинов ва Акбар Жўраев иштирок этди. Бу ҳақда Туризм ва спорт вазирлиги хабар берди.
Жаҳон чемпионатида -109 кг гача бўлган вазн тоифасида иштирок этаётган Руслан Нурудинов даст кўтаришда 185 кг тошни ўзига бўйсундириб, бронза медалини қўлга киритди.
Мазкур баҳсда кумуш медаль арманистонлик Симон Мартиросянга насиб этган. У бунинг учун 188 кг тошни бехато кўтара олган.
Айнан шу вазн тоифасида қатнашган Акбар Жўраев эса 195 кг тошни ўзига бўйсундириб, олтин медалга эга чиқди.
Силтаб кўтариш баҳсларида эса Токио олимпиадаси совриндори Акбар Жўраев 238 кг тошни кўтариб, икки тур натижаларига кўра мутлақ жаҳон чемпионига айланди. Умумий ҳисобда 3 та олтин медаль билан тақдирланди.
Яна бир олимпиада чемпиони Руслан Нурудинов 236 кг натижа билан кумушга лойиқ кўрилди ва икки кураш натижасига кўра, кумуш медалларни қўлга киритди. Арманистонлик Симон Мартиросян силтаб кўтаришда 228 кг тош билан бронза медалига эга чиқди.
Якунда Акбар Жўраев ва Руслан Нурудинов жами 6 та медал соҳибига айланишди.
Шу йили Ўзбекистонда ўтган оғир атлетика бўйича Осиё чемпионатида ҳам ушбу икки ўзбекистонлик спортчи чемпионлик учун бир-бирига рақиб бўлган эди.
Ўша вақтда Руслан Нурудинов 241 кг билан Осиё чемпионлигини қўлга киритишдан ташқари, янги жаҳон рекордини ўрнатганди. Осиё чемпионатининг кумуш медаль соҳиби эса Акбар Жўраев бўлган эди.
Бунга қадар, Руслан Нурудинов 2016 йил Рио де-Жанейрода ўтган олимпия ўйинларида рекорд ўрнатиб, олтин медални қўлга киритган эди.
Акбар Жўраев эса «Токио-2020» олимпия ўйинларида ҳам олтин медалга эга чиққанди.
