Москвада бўлиб ўтган WEF лигаси турнирида ўзбекистонлик спортчи иштирокида оммавий жанжал юзага келди, деб хабар берди журналист Александр Лютиков.
«Бугун Иван Яригин номидаги жанг аренасида WEF лигаси саралаш жанглари ўтказилди, унда Марказий Осиё спортчилари ўз карьерасини бошлашга уринишмоқда. Эрталабдан кечгача қирғизистонлик спортчилар ўзбекистонликлар билан жанг қилди — агар 53 та жанг бирорта оммавий муштлашувсиз ўтса ғалати бўлар эди. Ва у содир бўлди», — деб ёзди у телеграм каналида.
Ўзбекистонлик спортчи Намазан Самиев қирғизистонлик рақибини тезда мағлуб этди ва ҳар ким билан жанг қилишга тайёрлигини таъкидлади.
Кўнгилли топилганида эса ташкилотчилар дуэль ўтказишга қарор қилишган.
Видеода ўзбекистонлик спортчи жанг бошланишидан аввалроқ рақибининг бошига тизза билан зарба берганини кўриш мумкин.
«У нимага бундай қилди? Нима учун? Шу каби саволлар билан 50 киши актагонга югуриб чиқишди», — деб ёзди журналист.
Лавҳаларда одамлар бир неча маротаба Намазан Самиевга зарба беришганини кўриш мумкин. Унинг тарафдорлари эса спортчини ўраб олиб, ҳимоя қилишга уринишган.
Ҳодиса якунида полиция ходими ўзбеклар ва қирғизлар ака-укалигини, уларнинг бу қилиғи уят эканлигини айтган.
Маълумот ўрнида, WEF (World Ertaymash Federation) — «Кулатуу Эртаймаш ММА» Жаҳон миллий кураш федерациясининг қисқартирилгани номи. WEF турнирида Марказий Осиё ва узоқ хорижий мамлакатлар иштирок этади ва жанглар асосан ММА қоидалари бўйича ўтказилади.
