Кремль Туркия президенти Режеп Тоййиб Эрдоғанга совға қилинган турк дунёси харитаси билан тушган фотосуратга муносабат билдириб, унинг маркази Россияда, Олтойда эканлигини билдирувчи қизил юлдуз йўқлигидан афсусда эканини таъкидлади. Бу ҳақда РИА Новости хабар берди.
«Турк ҳамкорларимиз туркий бирлик ғоясини илгари сурмоқда, бу нормал ҳолат. Мен афсусда бўлишим мумкин бўлган ягона нарса шуки, турк дунёсининг марказида харитада ҳалигача катта қизил юлдуз йўқ. У Туркияда эмас, у Россия Федерацияси ҳудудида, Олтойда, ҳар қандай турк учун муқаддас бўлган ўша она заминда жойлашган», — деди президент матбуот котиби Дмитрий Песков «Россия 1» телеканалининг «Москва. Кремль. Путин.» дастурида журналист Павел Зарубин билан суҳбатда.
У бу сўзларни туркшунос сифатида айтаётганини таъкидлаб ўтди.
Мазкур харитани Эрдоғанга Миллиятчи ҳаракат партияси раҳбари Девлет Баҳчели тортиқ қилди. Қайд этилишича, мазкур харита шахсан Девлет Баҳчели бошчилигида тузилган бўлиб, унда Россия Жанубининг бир қисми, Шарқий Сибирь, шунингдек, Болқон ярим оролининг бир қисми, Озарбайжон, Қозоғистон, Қирғизистон, Ўзбекистон, Хитойнинг Шинжон-Уйғур автоном тумани, Мўғилистон ва Эроннинг айрим ҳудудлари, Қибрис ва Тракя акс эттирилган.
Турк оммавий ахборот воситаларининг маълум қилишича, мазкур фотосуратга юнон матбуоти ҳам муносабат билдирган. Хусусан, Yunan Greek City Times ушбу фотосуратни «қуюшқондан чиқарувчи» дея баҳолади.
