Қашқадарё вилояти Яккабоғ тумани ҳокими Лутфиддин Абдуллаевнинг 311 млн сўмлик Captiva автомашинаси ЙТҲга учради. Бу ҳақда «Nasafnews» хабар бермоқда.
Ҳокимнинг матбуот котиби Шерзод Ҳасановнинг «Nasafnews»га маълум қилишича, ҳодиса 7 ноябрь куни содир бўлган.
«Автомашина ичида дам олиш куни бўлгани учун туман ҳокими бўлмаган. Йўлдан ҳаракатланаётган ҳокимнинг ҳайдовчиси бошқа машинага йўл бераман деб йўлнинг ёқасига рулни бурган ва пастликка тушиб кетган. Ҳеч кимга жиддий жароҳат етмаган», — дея қўшимча қилади Шерзод Ҳасанов.
ЙТҲга гувоҳларнинг Daryo`га айтишича, «ЙТҲ туман марказидаги „Ал-Камол“ савдо маркази рўпарасида содир бўлган».
«Ҳайдовчи тез ҳаракатланиб келган ва бошқарувни йўқотган. Машина дарахтга „осилиб қолган“», — дейди воқеа гувоҳи.
Captiva хизмат машинаси сотиб олинишига қарши чиққан депутат. Фото: Elmurodbloger / Telegram.
Нашрнинг қўшимча қилишича, аварияга учраган 311 млн сўмлик Captiva харид қилинишидан аввал кўплаб можароларга сабаб бўлган. Халқ депутатлари туман кенгаши сессиясида кўриб чиқилган мазкур харид масаласи 25 нафар депутатнинг 24 нафари томонидан қўллаб-қувватланган бўлса, бир нафар депутат мазкур машинанинг сотиб олинишига қарши чиқиб, 311 млн сўм пулни муҳтожларга сарф қилиш такфлини берган.
«Газета.uz» январь ойида Қашқадарё вилояти Косон туманида ҳокимга тегишли Сaptiva автомашинаси йўлдан ўтаётган фуқарони уриб юборгани ҳақида ёзган эди. ЙТҲ оқибатида фуқаро оғир тан жароҳатларидан воқеа жойида вафот этган.
