24 октябрь куни бўлиб ўтган сайловда Ўзбекистон президенти этиб қайта сайланган Шавкат Мирзиёев Олий Мажлис палаталарининг шанба куни бўлиб ўтган қўшма мажлисида қасамёд қабул қилиб, давлат раҳбари лавозимига қайта киришди. Бу ҳақда «Газета.uz» мухбири хабар бермоқда.

Охирги сайловларда Ўзбекистон Либерал-демократик партиясидан номзод сифатида кўрсатилган Шавкат Мирзиёев сайловчиларнинг 80,4 фоиз (2016 йилги сайловда 88,6 фоиз, кейин эса 87,7 фоиз иштирок этган) овозини тўплаган эди.

Инаугурация Сенатнинг янги биносида (Ўзбекистон Ташқи ишлар вазирлигининг собиқ биноси) бўлиб ўтди. Маросим бошланишидан аввал Сенатнинг катта мажлислар залига жорий йилнинг октябрь ойида тасдиқланган штандарт (байроқ) ва президент белгиси киритилди.

Парламент қуйи ва юқори палаталарининг қўшма мажлисида Марказий сайлов комиссияси раиси Зайниддин Низомхўжаев Шавкат Мирзиёевга президент гувоҳномаси ва Марказий сайлов комиссиясининг шаҳодатномасини топширди.

Сўнг Шавкат Мирзиёев Ўзбекистон Конституцияси ва Қуръони Каримга қўлини қўйган ҳолда қасамёд қилди.

Конституциянинг 92-моддасига биноан, президент қуйидаги сўзларни айтди:

«Ўзбекистон халқига садоқат билан хизмат қилишга, республиканинг Конституцияси ва қонунларига қатъий риоя этишга, фуқароларнинг ҳуқуқлари ва эркинликларига кафолат беришга, Ўзбекистон Республикаси Президенти зиммасига юклатилган вазифаларни виждонан бажаришга тантанали қасамёд қиламан».