Ташқи ишлар вазири Абдулазиз Камилов «Россия 24» телеканалига берган интервьюсида Ўзбекистон геосиёсий рақиблар манфаатлари тўқнашадиган ҳудудга айланса, нима бўлиши ҳақидаги саволга жавоб берди. Интервью матни ТИВ матбуот хизмати томонидан эълон қилинди
«Бугун кўп қутбли, бир-бирига қарама-қарши дунё шаклланмоқда. Бундай дунёда яшаб, бир томонлама сиёсатга, бир томонлама векторга таянсангиз, у ҳолда бундай сиёсат етарлича маҳсулдор ва ҳаттоки контрмаҳсулдор бўлмайди. Янада аниқроғи, бундай йўналиш ўзида муайян хатарларни мужассам этиши мумкин», — деди ТИВ раҳбари.
«Йирик державалар билан ҳамкорликка келадиган бўлса, реалист бўлиш ва бу нарса аллақачон давом этаётганини тан олиш керак. Ҳаттоки ташқаридан етарлича яқин деб ҳисобланувчи мамлакатлар ўртасида ҳам. Айни пайтда бу ҳамкорлик минтақада давом этмоқда. Бундай шароитда биз нима қиламиз, деган савол туғилади. Биз ҳозир нима қилаётган бўлса, худди шундай қиламиз», — деди Абдулазиз Камилов.
Афсуски, унинг таъкидлашича, янги совуқ урушнинг дастлабки белгилари пайдо бўлиши билан рақобат янада кучайиб бормоқда. Бу дунёдаги вазият янада оғирлашаётган бир вақтда ушбу ҳодиса оқибатларини янада кучайтиради.
«Курашиш ва рақобат биз учун нохуш сиёсий оқибатларга олиб келишини истамас эдик. Улар бизни бир томон туфайли бошқа томон қабул қилмайдиган позицияни танлашга мажбур бўладиган ҳолатга келтиришлари қабул қилиниши мумкин эмас. Ушбу мураккаб вазифа жиддий дипломатик ишни талаб қилади», — деди Ўзбекистон ТИВ раҳбари.
«Умуман олганда, бизда бу борада тажриба бор, — дея қўшимча қилди вазир. — Марказий Осиё геостратегик жойлашувидан келиб чиқиб, ҳамиша диққат марказида бўлиб келган. Албатта, мен ҳеч қандай оқибатларга олиб келишини хоҳламайман».
«Агар афғон муаммосининг келиб чиқиши ва туб сабабларига қайтадиган бўлсак, бу, биринчи навбатда, совуқ уруш давридаги икки сиёсий тизим ўртасидаги кескин қарама-қаршилик натижаси бўлди. Шунинг учун бошқа сценарийлар аллақачон бошланган», — деди ТИВ раҳбари.
«Шунинг учун биз айни пайтда интилаётган йўналишни давом эттирамиз. Бизда аниқ тасаввур ва аниқ концепция бор. Биз ҳеч ким билан зиддиятга бормаймиз ва ҳар доим миллий манфаатларимиздан келиб чиқамиз», — дея хулоса қилди Абдулазиз Камилов.
