ССВ матбуот хизматининг хабар беришига кўра, Ўзбекистонга Pfizer/BioNTech вакцинасининг навбатдаги партияси олиб келинди.
Маълумотга кўра, 526 500 Pfizer/BioNTech вакциналари бугун Тошкент аэропортида қабул қилиб олинган.
«Газета.uz»даги маълумотларга кўра, ушбу вакциналар АҚШ ҳукумати томонидан COVAX глобал дастури доирасида юборилган. Олдинроқ ҳам АҚШ ҳукумати ушбу вакцинадан 1,2 млн доза юборган эди. Шундай қилиб, Ўзбекистонга олиб келинган Pfizer/BioNTechнинг умумий миқдори 1 млн 726 минг 500 дозага етди.
Аввалроқ, ССВ ушбу вакцинадан октябрь охиригача 800 минг доза келтирилишини маълум қилган эди. Демак, ой охиригача ушбу вакцинадан яна 274 минг 500 доза олиб келинади.
Бундан ташқари, вазирлик октябрь ойида Ўзбекистон яна 1,7 млн доза Sinovac вакцинасини қабул қилишини таъкидлади. Санитария-эпидемиологик осойишталик ва жамоат саломатлиги хизмати маълумотига кўра, Ўзбекистоннинг ўзида 15,5 миллион доза ZF-UZ-VAC2001 ҳамда 633 минг дозадан ортиқ икки компонентли «Sputnik V» вакциналари ишлаб чиқарилиши режалаштирилган. Йил охиригача Ўзбекистонга келтирилган вакциналар дозаси 47 миллионга етиши айтилмоқда.
«Ушбу миқдор билан Ўзбекистон аҳолисининг 17,4 миллион нафарини тўлиқ эмлаш мумкин бўлади», — дейилади хабарда.
Эмлаш бошланганидан бери Ўзбекистонга келтирилган вакцина миқдори 29 214 488 дозани ташкил қилмоқда.
Соғлиқни сақлаш вазирлиги Ўзбекистонда ота-оналар ва васийларининг розилиги асосида ихтиёрий равишда 12 ёшдан катта болаларни ҳам Pfizer/BioNTech вакцинаси билан эмлашга рухсат берилганлигини эслатиб ўтди.
14 октябрь ҳолатига кўра, 151 124 нафар 12 ёшдан 18 ёшгача бўлган болалар Pfizer вакцинаси билан ихтиёрий равишда эмланган.
