Ўзбекистоннинг амалдаги президенти, ЎзЛиДеПдан президентликка номзод Шавкат Мирзиёев сурхондарёлик сайловчилар билан учрашув чоғида таълим тизимига тўхталди.
«Ислоҳотларга 5 йил бўлди. Бирорта муаллим, бирорта шифокор туриб айтсин, „25 йилда менга нима манфаат келтирди?“, деб айтсин, мен улардан кечирим сўрайман агар бу нотўғри бўлса», — дейди президент.
У Андижонда профессорлар билан учрашганини эслаб ўтди.
«Хирургия кафедраси мудири менга айтяпти, „жаноб президент, 3 йил олдин 1 млн 200 минг сўм ойлик олардим, ҳозир мен 20 млн оляпман“, деб. „Мен ўзимни олим, деб сезяпман, олим“ деди у… Энди болаларимизни сифатли қилиб… Диплом керак эмас ҳозир, диплом мутлақо керак эмас. Касб керак! Билим керак! Сурхондарёга керак бўлган йўналишлар керак!», — дея қўшимча қилди Шавкат Мизиёев.
«Ана шунда биз, Худо насиб қилса, беш йилдан кейин бошқача жойларда учрашамиз. Сурхондарёда, бошқача жойларда. Бу биринчи қадам. Лекин биринчи қадамларимиз. Иборалар пайдо бўлди „қилса бўлар экан Сурхондарё заминида ҳам“, деган… Адолатли ҳакам бўлса, албатта, айтади: „қилса бўлар экан“, дейди. Ҳаммага буни тушунтириш керак эмас», — дейди у.
Президент инсофи бўлган одам ислоҳотларга ўзи баҳо беришини таъкидлади.
«Агар инсофи бўлса, худодан умиди бўлса, инсофи бўлса, „қилди-ку, қилса бўлар экан-ку, келажакда ҳам қилар экан-ку ва бизнинг либерал демократий партиямиз қилади“, деган ишонч бўлиши керак ҳаммада», — деди ЎзЛиДеПдан президентликка номзод Шавкат Мирзиёев.
