19 август куни Олий Мажлис Сенати Кенгашининг мажлиси бўлиб ўтди.
Унда Марказий банк томонидан янги кўринишдаги 5 000 (беш минг) сўмлик ва 10 000 (ўн минг) cўмлик банкнотларнинг чиқарилиши тўғрисидаги масала кўриб чиқилди.
«Газета.uz»га Марказий Банк матбуот хизмати маълум қилишича, банкнотларнинг янги дизайни регулятор томонидан ишлаб чиқилган.
Эслатиб ўтамиз, 5000 сўмлик банкнота 2013 йилнинг 1 июлидан, 10 000 сўмлик эса 2017 йилнинг 10 мартидан муомалага киритилган.
Қиймати 5000 сўм бўлган пул билетлари 144×78 мм. ўлчамдаги ҳимояланган қоғозда тайёрланган. Банкнотнинг марказида «Олий Мажлис» меъморий биноси, бино гумбазининг тепасида Ўзбекистон Республикасининг рангли байроғи тасвирланган.
10 000 сўмлик пул белгилари 144×78 мм. ўлчамдаги ҳимояланган қоғозда тайёрланган.
Оқ рангли сатҳнинг чап тарафидан қоғоз қатламида «Дарча» ва «3D» эффектли юзага чиқиб, ичкарига ботувчи ҳимоя ипи ўтказилган. Банкнотнинг марказида «Сенат» меъморий биноси тасвирланган.
