Марказий сайлов комиссияси матбуот хизмати ижтимоий тармоқлардаги муҳокамалардан сўнг, президент сайлови логотипига ўзгартиш киритилганини маълум қилди.
23 июль куни Ўзбекистон президенти сайлови кампаниясига старт берилди. Шунингдек, 28 июль куни ўтказилган матбуот анжуманида сайлов логотипининг тақдимоти ўтказилди.
Мазкур тақдимотдан сўнг логотип, унинг ранглари, тузилиши, дизайни ва логотипнинг лотинча ёзувидаги версиясидаги имловий хато ижтимоий тармоқ фойдаланувчиларининг бахс-мунозарасига сабаб бўлди.
Дастлаб эълон қилинган логотип.
Қайд этилишича, ушбу муҳокамаларда билдирилган таклифлар Марказий сайлов комиссиясининг ишчи гуруҳи томонидан соҳа мутахассисларини жалб қилган ҳолда ўрганилган. Ўрганишлар натижасида логотипга айрим имловий тузатишлар киритилган.
Шунингдек, ушбу логотипни яратиш жараёнида маблағ сарф этилмаганлиги маълум қилинди.
«Марказий сайлов комиссияси мамлакатимиз жамоатчилиги сайлов жараёнларига бефарқ эмаслигини эътироф этади ва ўз миннатдорлигини билдиради. Келгусида ҳам Марказий сайлов комиссиясининг фаолияти борасида билдирилган ҳар қандай холис фикр-мулоҳаза эътиборсиз қолмайди», — дейилади хабарда.
Аввалроқ, журналист Муҳрим Аъзамхўжаев президент сайловининг логотипини тайёрлашга уч ой вақт кетгани ва унда бир нечта имловий хатолар борлиги ҳақида ёзган эди.
