Тошкент метроси кузатилган муаммолар ортидан Транспорт прокуратураси «Тошкент метрополитени» унитар корхонасининг фаолиятини ўрганиб чиқди. Бу ҳақда «Ўзбекистон24» репортажида сўз борди.
Республика транспорт прокурори Маъруфжон Хўжаевнинг сўзларига кўра, метродаги муаммоларга айрим мансабдорларнинг вазифасига совуққонлик билан қарагани сабаб бўлган.
«Шу йилнинг май-июнь ойларида «Тошкент метрополитени»да ўтказилган ўрганишлар натижасига кўра, айрим масъул мансабдор шахсларнинг ўз хизмат вазифаларига панжа ортидан қараши оқибатида жами 650 та инсон омили билан боғлиқ камчилик аниқланган», — деди у.
Республика транспорт прокурори Маъруфжон Хўжаев.
У, шунингдек, метрополитенида амалга оширилган қурилиш ишларида ҳам талон-торожликларга йўл қўйилганини қайд этди.
«Тошкент халқа йўли ер ости метрополитенида олиб борилган қурилиш ишларида 899 млн сўм талон-торож қилингани аниқланган. Мазкур ҳолатлар юзасидан Жиноят кодексининг тегишли моддалари билан жиноий иш қўзғатилиб, тергов ҳаракатлари натижасига кўра айбдорларга нисбатан жазо муқаррарлиги таъминланади», — деди транспорт прокурори.
Репортажда таъкидланишича, метрода юз бераётган нохуш ҳолатларнинг олдини олиш, эскирган ускуна ва зарурий техник воситаларни янгилашга давлат бюджетидан маблағ ажратилмоқда.
«Март ойидан бошлаб 11 та ҳолат бўлди. Битта нарса борки, агар ҳамма ўзига бириктирилган хизмат вазифасини тўлиқ бажарганида, ўшанга ўхшаган ҳолатлар бўлмаслиги мумкин эди. Сизлар орқали 4200 нафарлик жамоага бу ердаги гапларнинг ҳаммаси етиб бориши керак», — деди «Тошкент мертрополитени» УК бошлиғи Раҳмонбек Усмонов.
Тақдимотдан кўриш мумкинки, йиғилишда, шунингдек, «Тошкент метрополитени» даромадларини ошириш режаси ҳам муҳокама қилинган.
Унга кўра, июль ойидан декабргача кунлик йўловчилар сонини 240 мингдан, 400 минг нафарга етказиш режа қилинган. Йилнинг кейинги ярмида кунлик даромадни 336 млн сўмдан 560 млн сўмгача ошириш кўзда тутилган.
Қолаверса, Тошкент метрополитени реклама хизматини янада яхшилашни кўз остига олиб қўйган. Жумладан, метрода жойлаштириладиган реклама ортидан июлдан 400 млн сўмдан, декабрга келиб эса 1 млрд сўмдан, жами 6 ойда 4 млрд 100 млн сўм даромад олиш мақсад қилинган.
Бундан ташқари, шу йилнинг биринчи чорагида «Тошкент метрополитени» ишчи-ходимларининг ўртача ойлик маоши 2,2 млн сўмни ташкил қилгани қайд этилди. Бу «Ўзбекистон темир йўллари» АЖ ишчиларининг ойлигидан 1,8 млн сўмга кам. Шу боис, метрода фаолият юритувчи ходимларнинг ойлигини сентябрга қадар ўртача 3,1 млн сўмга, ноябрга келиб эса 3,7 млн сўмга ошириш таклифлари билдирилди.
Эслатиб ўтамиз, «Газета.uz» 8 апрелда Тошкент метросининг Сергели йўналишида поезд техник сабабларга кўра тўхтаб қолгани, йўловчилар эса эстакада орқали эвакуация қилингани, 10 апрелда «Пушкин» ва «Буюк ипак йўли» станциялари ўртасида ҳаракатланаётган метро вагонининг эшиги очиқ қолгани, апрель охирига келиб «Новза» метро бекати яқинида поезд тўхтаб қолиб, йўловчилар бекатгача рельслардан юриб боргани ҳақида хабар қилганди.
Мазкур воқеалардан сўнг, 25 июнь куни президент Шавкат Мирзиёев метродаги муаммолар ечимига эътибор қаратган эди. «Ҳозир 40 млрд сўмлик алоҳида подстанция харид қиляпмиз. Тошкент метрополитенининг энергия тизими алоҳида бўлади», — деган эди у.
