Германия Намибиянинг туб аҳолиси геноцидини расман тан олди

Германия бир асрдан кўпроқ вақт олдин Aфриканинг жануби-ғарбидаги мамлакат империясининг мустамлакачилик даврида Намибиянинг туб аҳолиси бўлган гереро ва нама халқларига қарши содир этилган жиноятларни расман тан олди. «Биз бугунги Намибияда мустамлакачилик даврида содир бўлган воқеаларни, биринчи навбатда 1904 йилдан 1908 йилгача бўлган ваҳшийликларни ўз номлари билан аташимиз керак. Энди биз ушбу воқеаларни расмий равишда бугунги нуқтаи назардан геноцид деб атаймиз», — деди Германия ташқи ишлар вазири Хайко Маас. Германия Намибия учун қишлоқ жойларда инфратузилмани, сув таъминоти тизимларини, касб-ҳунар таълими тизимини яхшилаш учун 1,1 млрд евролик махсус дастурни ишга туширади.

1904 йилда бошланган қўзғолонни бостириш учун немис қўшинлари камида 65 минг герерони, жумладан деярли барча эркакларни, аксарият аёллар ва болаларни ўлдирган эди. Германия 2004 йилда мустамлакачилик ўтмиши учун «кечирим сўраган эди». — ТАСС.

27 май куни Франция президенти Эммануэль Макрон илк бор Руандадаги геноцид учун мамлакат жавобгарлигини тан олди. Макрон, шунингдек, Руанда аҳолисидан кечирим сўради. 1994 йилда Руандада номаълум шахслар йўловчи самолётини уриб туширишган, унинг бортида мамлакат президенти Жювеналь Хабиаримана ва қўшни Бурунди раҳбари Сиприен Нтарьямира ҳам бор эди. Президентларнинг ўлими ҳокимиятни эгаллаш, шунингдек, тутсиларнинг кичик этник гуруҳига ва мўътадил хуту сиёсатчиларига қарши геноцидни бошлаш учун баҳона сифатида ишлатилган эди. 1994 йил апрель-июнь ойларида 800 мингга яқин одам ўлдирилди. — РИА Новости.

"Газета.uz"да реклама

Аввалроқ 24 апрель куни AҚШ президенти Жо Байден Усмонли империясида арманларнинг оммавий қирғин қилинганини расман тан олган эди.

Бутун Беларус халқ йиғилиши президентга импичмент эълон қилиш ҳуқуқига эга бўлади

Бутун Беларус халқ йиғилиши президент хиёнат қилган тақдирда унга импичмент эълон қилиши мумкин, деди мамлакат Конституциявий суди раиси Пётр Миклашевич. «Импичмент эълон қилиш бўйича парламент ваколатларини Бутун Беларус халқ йиғилишига ўтказиш таклиф қилинмоқда. Президент юқори лавозимдаги комиссия муносабати билан хиёнат қилгани ёки бошқа оғир жиноят содир этгани учун ўз лавозимидан четлаштирилиши мумкин», — деди Миклашевич. Бундан ташқари, унинг сўзларига кўра, йиғилишга президент сайловларининг қонунийлиги масаласини кўриб чиқиш ҳуқуқи берилиши керак. — БелТА.

Бутун Беларус халқ йиғилиши Вакиллар палатаси депутатлари ва Республика Кенгаши аъзолари, шунингдек, мамлакатнинг барча ҳудудларидан маҳаллий ўзини ўзи бошқариш органлари вакиллари, сиёсий партиялар ва жамоат бирлашмалари вакилларидан иборат. Бутун Беларус халқ йиғилиши аъзолари сони 2,5 минг кишини ташкил қилади.

Шунингдек: Беларус Украинадан бир қатор импорт қиланадиган товарларга олти ой давомида индивидуал лицензиялаш тартибини жорий этди. Янги режимга қуйидаги товарлар киритилди: қандолат маҳсулотлари, шоколад, шарбатлар, пиво, ДСП ва ДВП, гулқоғоз (обои), туалет қоғози ва қадоқлаш буюмлари, ғишт, керамик плиткалар, шиша ампулалар, экиш учун қишлоқ хўжалиги техникаси, кир ювиш машиналари ва мебель.

34 мингдан зиёд гонконглик Буюк Британияга кўчиб ўтишга мурожаат қилди

Лондоннинг январь ойи охирида янги иммиграция дастурини ишга туширганидан буён дастлабки икки ой ичида 34,3 мингга яқин Гонконг аҳолиси Буюк Британияга кўчиб ўтишга мурожаат қилди. Февраль-март ойларида ушбу махсус визаларнинг 7,2 мингтаси тасдиқланди. Уларнинг эгалари Буюк Британияда беш йилгача қолишлари, у ерда иш топишлари ёки ўқишлари, сўнгра Буюк Британия фуқаролигини олиш учун ариза беришлари мумкин бўлади.

Буюк Британияда 31 январдан бошлаб Гонконг аҳолиси учун Британия чет эл ҳудудлари (BNO, British National Overseas) паспортлари эгалари орасида махсус иммиграция канали очилган. Ушбу қарорга Хитойнинг Гонконгда миллий хавфсизликни таъминлаш тўғрисидаги қонуннинг қабул қилиниши сабаб бўлди. Буюк Британиянинг фикрига кўра, ушбу ҳуқуқий акт Гонконг аҳолисининг ҳуқуқлари ва эркинликларига таҳдид солмоқда, ушбу ҳудуднинг автоном мақомини ва 1997 йилда уни ўтказиш шартлари тўғрисидаги қўшма декларация қоидаларини бузмоқда. Буюк Британия Ташқи ишлар вазирлиги маълумотларига кўра, Гонконгда Британия фуқароси махсус мақомига эга бўлган деярли 3 млн киши яшайди. Ушбу шахслар Гонконгнинг Хитойга ўтказилишидан олдин туғилган ва 1997 йил 30 июнга қадар бошқа давлатларнинг фуқаролигига эга бўлмаганлардир. Жорий йилнинг 29 январида ХХР ва Гонконг ҳукумати Британиянинг Гонконг аҳолисининг чет элдаги паспортларини тан олмасликларини эълон қилишди. — ТАСС.

Молдова президенти ИИВ раҳбарини унинг оила аъзолари ортидан кузатув олиб бораётганликда айблади

Молдова президенти Майя Санду республика Ички ишлар вазирлиги бошлиғи Павел Войкуни ўз оила аъзолари ортидан ноқонуний кузатув олиб бораётганликда айблади. «Вазир менинг орқамдан кузата олмайди, чунки менинг соқчиларим бор. Ва у менинг оилам ортидан кузатув олиб боришни буюрган. Бу босим ўтказиш мақсадида амалга оширилмоқда. Менинг маълумотларимга кўра, кузатув камида бир неча ҳафтадан бери давом этмоқда», — деди Санду. «Бу социалистлар партиясига кирмайдиган сиёсатчиларга нисбатан содир бўлаяпти, бу социалистлар кўрсатмаси билан амалга оширилаётгани аниқ», — дея қўшимча қилди у. Шунингдек, мамлакат президенти вазир устидан шикоят ёзмаслигини айтди. Майя Санду «ҳуқуқни муҳофаза қилиш идораларини пораҳўрлардан тўлиқ тозалаш»ни амалга ошириш тарафдори эканлигини таъкидлади. — ТАСС.

Россия Европадан Беларус ҳудудини айланиб ўтиб Москвага келаётган самолётларни қабул қилмади

26, 27 ва 28 май кунлари Air France ва Austrian Airlines авиакомпанияларининг Москвага рейслари бекор қилинди. Aвиакомпаниялар парвозни Беларус ҳудудини айланиб ўтиб амалга оширмоқчи бўлгани учун Россия авиация идоралари Москвага қўниш учун рухсат бермади. Европа Иттифоқи дипломатияси раҳбари Жозеп Боррелнинг таъкидлашича, Европа Иттифоқи Москванинг ҳамжамият мамлакатларидан самолётларни қабул қилишдан бош тортганидан хавотирда. Шунингдек, у бундан кейин ушбу вазият туфайли Москва ва Брюссель ўртасидаги зиддиятнинг кучайишини истисно қилмади. — Интерфакс.

Исроил БМТнинг Инсон ҳуқуқлари бўйича кенгашининг Фаластинга оид қарорини рад этди

Исроил ТИВ БМТнинг Инсон ҳуқуқлари бўйича кенгаши томонидан қабул қилинган «Фаластин ҳудудларида инсон ҳуқуқлари бузилишини тергов қилиш бўйича комиссия тузиш» тўғрисидаги қарорни рад этди. Исроил ТИВ бундай тергов билан ҳамкорлик қилмаслигини ва қила олмаслигини таъкидлади. Исроил бош вазири Биньямин Нетаньяху бу қарорни «уятли» ва «халқаро ҳуқуқни масхара қилиш» деб атади.

Ғазо секторини назорат қилаётган ХAМAС ташкилоти БМТ Инсон ҳуқуқлари кенгаши томонидан қабул қилинган қарорни мамнуният билан қабул қилди.

27 май куни БМТнинг Инсон ҳуқуқлари бўйича кенгаши кўпчилик овози билан Ғазо сектори ва Исроилда, шунингдек Шарқий Қуддус ва Фаластин ҳудудларида инсон ҳуқуқлари бузилишини текшириш учун комиссия тузиш бўйича қарор қабул қилди.

Шунингдек:

  • Суриядаги президент сайловларида амалдаги давлат раҳбари Башар Асад 95,1% натижа билан ғалаба қозонди. У 20 йилдан ортиқ вақт давомида мамлакатни бошқариб келмоқда.
  • Литва Беларуснинг икки дипломатини мамлакатдан чиқариб юбормоқда.
  • Украина Беларусда рўйхатдан ўтган самолётлар учун ҳаво майдонини ёпади.