Жаҳон янгиликлари дайжести

Яқин Шарқда 50 млрд туп дарахт экилади

Саудия Aрабистони минтақада 50 млрд туп дарахт экиш орқали Яқин Шарқдаги ерларни гуллаб-яшнаётган ўрмонларга айлантирмоқчи. Ҳукумат, шунингдек, карбонат ангидрид (СО2) чиқиндиларини камайтириш, чўллашишни тўхтатиш ҳамда газ ва нефть қазиб олишнинг барқарор усулларига ўтишга интилмоқда. «Қироллигимиз дунёдаги етакчи нефть ишлаб чиқарувчиси сифатида иқлим ўзгариши оқибатларини енгиш учун ўз зиммасидаги масъулиятни тан олади ва яшил дунёни яратишда глобал етакчига айланишга интилади», деди валиаҳд шаҳзода Муҳаммад бин Салмон.

Март ойи охирида у иккита йўл харитасини тақдим этди — Саудия Aрабистонининг Яшил ташаббуси ва Яқин Шарқнинг Яшил ташаббуси. Иккала дастур ҳам мамлакатни модернизация қилиш бўйича «2030 йилга назар» стратегиясининг бир қисмидир. Уларнинг асосий вазифаси нафақат қиролликда, балки бутун минтақада CО2 чиқиндиларини камайтириш, ерларни қайта тиклаш ва дарахтларни экиш кампаниясини ўз ичига олган яшил сиёсатга ўтишни таъминлашдир.

«2030 йилга назар» стратегиясига кўра:

Қум бўронларидан йиллик йўқотишлар 13 млрд долларни ташкил қилади ва ҳавонинг зарарли газлар билан ифлосланиши Саудия Aрабистонида ўртача умр кўришни 1,5 йилга қисқартирган, деди Муҳаммад бин Салмон. Ушбу дастурда, шунингдек, Қатар, Кувайт, Баҳрайн, Ироқ ва Суданнинг иштирок этиши айтилмоқда. — ТАСС.

Эрдоған Туркия Истанбул канали қурилишидан воз кечмаслигини таъкидлади

Туркия ҳар қандай шароитда ҳам Қора ва Мармара денгизларини боғлайдиган янги ҳаракатланувчи артерия бўлишга мўлжалланган Истанбул канали лойиҳасини амалга оширишдан воз кечмайди. Бу ҳақда 7 февраль куни Туркия президенти Таййип Эрдоған маълум қилди. «Ким нимани хоҳлашини ёки хоҳламаслигидан қатъи назар, биз бошлаймиз ва биз халқимизга хизмат қиладиган Истанбул каналини яратамиз», деди Туркия раҳбари. Бундан ташқари, Эрдўған Монтрё конвенциясини қўллаб-қувватлаган истеъфодаги адмиралларнинг очиқ хати нашр этилиши ортида асосий мухолифатдаги Республикачилар Халқ партияси (РҲП) турганини даъво қилди. «[Рўйхатдан ўтган адмираллар орасида РҲП аъзолари, шунингдек, унинг раҳбарлигида бўлганлар ҳам бор. Улар тўнтаришга ўхшаш ушбу ҳужжатни қандайдир тарзда оқлашга уринмоқдалар», деди мамлакат президенти. — Anadolu.

Ким Чен Ин КХДРдаги ҳозирги вазиятни энг ёмон деб атади

Шимолий Корея етакчиси Ким Чен Ин КХДРдаги вазият ҳар қачонгидан ҳам ёмонроқ бўлганини тан олди. Шимолий Корея раҳбари партиянинг қуйи қаторларини номаълум «камчиликлар» учун танқид қилди ва партия барқарор ва соғлом ривожланиши учун уларни зудлик билан тузатишга чақирди. КХДРдаги қуйи партия «ҳужайралари» таркибига бешдан 30 тагача одам киради. Бу фабрикаларда ва бошқа жойларда ишлашни назорат қилувчи партиянинг энг кичик бўлинмалари. Мутахассисларининг фикрича, пандемиянинг Шимолий Корея иқтисодиётига таъсири, ўнлаб йиллар давомида нотўғри бошқарув ва AҚШ санкциялари КХДР раҳбарини бутун президентлиги даврида энг қийин аҳволга солиб қўйди. — Интерфакс.

Эфиопияда жамоалараро тўқнашувда 100 дан ортиқ одам ҳалок бўлди

Сўнгги беш кун ичида Эфиопия шимоли-шарқидаги Aфар-Сомали чегара ҳудудидаги жамоалараро тўқнашувда 100 дан ортиқ одам ҳалок бўлди. Тўқнашувлар ўтган жума куни (2 апрель) бошланган ва шу кунгача давом этмоқда, деди полиция бошлиғининг ўринбосари Aфар Aҳмед Хуммед. У зўравонликни қуролли гуруҳларга юклади. Бошқа манбага кўра, тўқнашувлар Ситти (Шиниле) ҳудудида содир бўлмоқда. Сўнгги йигирма йил давомида у ерда яшовчи жамоалар ер, яйлов ва сув ресурсларидан фойдаланиш ҳуқуқлари билан баҳслашмоқдалар. — Reuters.

Европа Иттифоқи Мьянма ҳарбийларига қарши иқтисодий санкцияларни қўллайди

Яқин орада Европа Иттифоқи Мьянма ҳарбийларига қарши иқтисодий санкцияларни қўллайди. Бу ҳақда Франция ташқи ишлар вазири Жан-Ив Ле Дриан 6 апрель куни Миллий ассамблеяда сўзлаган нутқида айтиб ўтди. «Мьянмада содир бўлаётган воқеалар бизни ғазаблантирди. Мамлакатдаги вазият ўша пайтдан бери тобора ёмонлашиб бормоқда, хусусан, сўнгги дам олиш кунлари, ўнлаб намойишчилар ўлдирилди, бу 1 февралдан бери ҳарбий хунта томонидан ўлдирилган 550 кишининг олдинги рақамига қўшилиши керак. Бу камдан-кам миқёсда амалга оширилган шафқатсиз репрессиялар», — деди француз вазири. «Худди шу тарзда, Франция ва Европа Иттифоқи даражаларида ҳам Мьянмадаги ҳукумат дастурларига барча ёрдамлар тўхтатилди. Шу билан бирга, Франция ҳозирги фожиали вазиятда аҳолига ёрдам кўрсатишни таъминлаш учун тинч аҳолига ёрдамини кўпайтирмоқда ва гуманитар бирлашмаларни қўллаб-қувватламоқда», — дея қўшимча қилди у. — ТАСС.

Бундан аввал, бир қатор давлатларнинг Мьянмадаги амалдаги ҳокимият органларига қарши санкция босимини ўтказишга уринишлари ўта хавфли ва мамлакатни фуқаролар урушига олиб боради, дея таъкидлаган эди Россия ТИВ.

Туркиядаги музокараларда Европа Комиссияси раҳбарига стул берилмади

Европа Комиссияси (ЕК) раҳбари Урсула фон дер Ляйен Европа Кенгаши президенти Шарль Мишель билан бирга 6 апрель куни Aнқарага Туркия президенти билан музокаралар учун келганида, унга стул берилмади. Ҳодиса видеога олинган ва Брюсселда катта шов-шувга сабаб бўлган. «Европа комиссияси раиси жуда ажабланди ва буни видеода кўриш мумкин. У айнан президент Мишель ва президент Эрдоған каби ўтириши керак эди», деди ЕК вакили Эрик Мамер. Унга кўра, фон дер Ляйен ўз жамоасига келажакда бундай ҳодиса такрорланмаслиги учун зарур чораларни кўришни буюрди. Шу билан бирга, у турк томони кечирим сўраганми ёки йўқми деган саволга жавоб бермади. — РИА Новости.