Арманистон парламентининг «Мой шаг» хукмрон фракцияси раҳбари Лилит Макунцнинг маълум қилишича, мамлакат бош вазири Никол Пашинян апрель ойи охирида истеъфо беради. Бу ҳақда Интерфакс хабар берди.
Фракция раҳбарининг айтишича, «ҳозирча аниқ куни маълум эмас, лекин бу апрель охирида рўй беради».
Аввалроқ Никол Пашиняннинг ўзи апрел ойида истеъфога чиқиши ҳақида маълум қилган эди. Шунингдек, у бундан олдин 20 июнь куни Арманистонда навбатдан ташқари парламент сайловлари бўлиб ўтишини эълон қилганди.
Амалдаги парламентни тарқатиб юборилиши учун Арманистон бош вазири истеъфога чиқиши керак бўлади. Агар парламент икки марта янги бош вазир сайлай олмаса, у автоматик равишда тарқатиб юборилади, шундан сўнг янги парламент сайловлари ўтказилади. Янги бош вазир парламентда кўпчилик томонидан тайинланиши лозим.
Бундан ташқари, 7 апрель куни Никол Пашинян ва Россия президенти Владимир Путин ўртасида учрашув бўлиб ўтиши режалаштирилган.
