Душанба куни Республика хотин-қизлар жамоатчилик кенгашининг биринчи йиғилиши бўлиб ўтди. Унда кенгаш ҳамда Сенат раиси Танзила Нарбаева хорижда меҳнат қилаётган мигрант аёллар масаласига ҳам тўхталиб ўтди, дея хабар бермоқда «Газета.uz» мухбири.
«Бандлик вазирлиги чет элда бўлиб турган мигрант хотин-қизлар рўйхатини янгилаган ҳолда юртига қайта олмаётган ёки қийин аҳволга тушганларни оиласига қайтариш ҳамда иш билан таъминлаш чораларини кўриши керак. Биз мамлакатдаги нотурар жойда яшаётган хотин-қизларни 9 мингта деб аниқладик, у ёқда қанча экан? Россия, Қозоғистон, Кореяда, билмайман яна қаерда юрибди аёллар», — деди кенгаш раиси.
Бу борада амалга оширилаётган ишлар ҳамда келгусидаги режалар ҳақида бандлик ва меҳнат муносабатлари вазирининг биринчи ўринбосари Эркин Мухитдинов маълумот берди.
«Бу борада ҳар битта маҳалла бўйича хатлов кетаяпти, апрелда охиригача етиш керак. Шундан кейин қўлимизда тўлиқ рақамлар бўлади. Кимни иш билан таъминлаймиз, кимни қайтариб олиб кела оламиз аниқ бўлади», — деди у.
«Масалан ўша ерда уйи, касби бўлмаса, кечирасиз-ку, бировларнинг оғир, қийин ишини қилиб юргандан кўра, бу ерга келсин мана шу ишлардан берайлик. Ташқи ишлар вазирлиги билан ҳам бирга ишлаш керак. Иккита йўли бор, бу ерга қайтариб олиб келиб, касбга тайёрлаш, хорижга ишлашга бораман деса, яна жўнатиш ёки шу ерда иш билан таъминлаш», — дея таъкидлади Нарбаева.
«Уни ҳам механизми бор. 3 ойгача хостелларда жой бераяпмиз, у ерда иш топа олмаса, бу ерга қайтариб олиб келаяпмиз ва иш бераяпмиз», — дея қўшимча қилди вазирлик вакили.
Республика хотин-қизлар жамоатчилик кенгаши раиси Танзила Нарбаеванинг таъкидлашича, «хориждаги мигрант аёллар билан ишлашни ўз ҳолига ташлаб қўйиш керак эмас».
У сўзида давом этар экан, мамлакатдаги мардикор аёлларнинг бир марталик иш қидириб, кўчада ўз кучини таклиф қилиб туриши масаласига ҳам тўхталиб ўтди.
«Мардикорлик билан шуғулланаётган аёлларимиз бор. Мардикорлик дейилади, лекин бу жуда хунук гап. Бир марталик иш дейлик. Мана шундай фаолиятга эҳтиёжи бор аёлларимиз мавжуд. Тошкент шаҳрининг ўзида 6 та кунлик ишчилар марказлари [Вақтинчалик бир марталик иш билан таъминлаш марказлари] ташкил этилди. Республика бўйича эса жами 31 та. Бу масалага ҳудудлардаги опа-сингилларимизнинг алоҳида эътиборини қаратмоқчиман. Сизлар [йиғилишда онлайн қатнашаётган маҳаллий ҳокимият ва ННТлар вакиллари — таҳр.] бу масала Бандлик ва меҳнат муносабатлари вазирлигининг иши экан, деб қараб ўтирманглар. Яшаш ҳудудингиздаги бозор ёки кўчалар ёқасида аёллар ишчи кучимни сотаман, деб тўпланиб туришади. Мана шундай жойга ўзингиз боринглар, аёллар билан суҳбат қилинглар», — деди у.
Сенат раиси вақтинчалик ишларни замонавий тартибда ташкил қилиш кераклигини қўшимча қилди.
«Аёллар кўчада ўз ишчи кучини таклиф қилиб туриши жуда хунук ҳолат. Бир марталик ишларни замонавий тартибда ташкил қилишимиз керак. Мавжуд кунлик ишчилар марказларининг ишлаб кетишини ҳам йўлга қўйиш зарур. Вилоятларга хизмат сафари билан чиққанимда, албатта, ўша жойларга мен ҳам бораман. Бундай мардикор бозорлар Қўқон, Тошкент шаҳри ва вилоятида кўп», — деди Республика хотин-қизлар жамоатчилик кенгаши раиси.
«Биз шунақа марказларни қуриб, тадбиркорларга бермоқчимиз. Чунки давлат сифатида бизга қийинроқ, аёллар бизга қулоқ солмайди, ишонмайди. Шу марказларни аёлларга бериб, шароит яратиб берамиз. Буни таклиф сифатида Вазирлар Маҳкамаси қарори лойиҳасига киритдик», — деди вазир ўринбосари.
