Навоий вилоятида фарзандсизликдан қийналган фуқарога ўз боласини сотмоқчи бўлган аёл ушланди. Бу ҳақда ЎзА хабар бермоқда.
Маълумотларга кўра, фарзандсизликдан қийналган К.Д. никоҳсиз дунёга келган боласини 25 минг АҚШ долларига сотишини айтган А.И.га чақалоқ учун шу нархга баҳоланган икки хонали уй олиб беришни таклиф қилган.
А.И. хонадоннинг кадастр ҳужжатларини олиб, эвазига вояга етмаган фарзандини К.Д.га топшираётган вақтида ушланган.
А.И. ЖКнинг 135 моддаси 3 қисми «а» бандига кўра (ўн саккиз ёшга тўлмаганлиги айбдорга аён бўлган шахсга нисбатан одам савдоси) айбдор деб топилган.
Уни жамиятдан ажратмаган ҳолда ахлоқан тузатиш имконияти мавжуд деб ҳисоблаб, унга нисбатан ЖКнинг 57-моддасини (енгилроқ жазо тайинлаш) қўллаб, озодликни чеклаш жазоси тайинланган.
ИИВ Тергов департаменти масъул ходими Наргиза Ҳожибоева, чақалоқ савдосига келтирувчи асосий омиллари бу — боланинг онаси ижтимоий ҳимояланмай, моддий эҳтиёжлари таъминланмаганлиги, турмушга чиқмаган аёллар ҳомиладор экани ва чақалоқни оиласидан яширишга уриниши дея таъкидлаган эди.
