Давлат хизматлари агентлиги Ўзбекистон ва АҚШ президентлари исмларига аталган тадбиркорлик субъектларининг рўйхатга олинганлиги ҳақида муносабат билдирди.

Гап Самарқанд вилоятидаги «Шавкат Миромонович Мирзиёев» номли оилавий фирма ва «Joe Biden» МЧЖ ҳақида кетмоқда. Биринчиси 2020 йил 14 февраль куни рўйхатдан ўтказилган бўлса, иккинчиси 2021 йил 21 январь куни, яъни АҚШ янги президентининг инаугурацияси куни расмийлаштирилган.

Хабар берилишича, «Шавкат Миромонович Мирзиёев» номи билан рўйхатга олинган фирма номи «Toshkent Chilonzor Trade» га, «Joe Biden» МЧЖ эса «White Eagle 070» номига ўзгартирилган.

Тадбиркорлар билан суҳбат ўтказилиб, «Фирма номлари тўғрисида"ги қонунга кўра Ўзбекистонда фирмани номлашда тарихий ёки таниқли шахснинг исмини қўллашда белгиланган тартибдаги рухсатнома талаб қилиниши тушунтирилган.