2021 йил январидан бошлаб Тошкент шаҳридаги жамоат транспортларида имтиёз асосида транспортда ҳаракатланиш ҳуқуқига эга бўлган йўловчилар — ўқувчилар, талабалар ва нафақахўрлар учун транспорт карталари жорий этилди.
25 декабрь куни Тошкент транспорт департаменти «Газета.uz»га нақд тўловлар бекор қилинмаслиги тўғрисида хабар берди. Бундан ташқари, транспорт карталарига босқичма-босқич ўтиш учун «Тошшаҳартрансхизмат» AЖ йўловчи ташиш оператори ойлик йўловчи чипталарни бугунги кўрсаткичнинг 50% миқдорида чиқаришни режалаштирмоқда. Февраль ойидан бошлаб йўловчи чипталарини сотиш тўхтатилади.
Шунга қарамай, йўриқнома транспорт карталарига ўтувчи барча жамоат транспорти йўловчилари учун долзарблигича қолмоқда.
Мақолада қуйидаги саволларга жавоб топасиз:
Қандай транспорт карталари мавжуд?
Имтиёзли транспорт картаси оддий транспорт картасидан нимаси билан фарқ қилади?
Транспорт картасини қаердан сотиб олиш мумкин?
Транспорт карта балансини қандай тўлдириш мумкин?
Транспорт картаси орқали тўлов қандай амалга оширилади?
Картани уйда унутиб қолдирибман. Қандай йўл тутишим керак?
SMS-хабарнома хизматини қандай фаоллаштириш мумкин?
Мобил телефон орқали тўлов қандай амалга оширилади?
Мен транспорт картамни йўқотиб қўйдим. Унда жуда кўп пул бор эди. Қандай йўл тутишим керак?
Менинг картам ишдан чиқди. Нима қилиш керак?
Қисқа муддатга меҳмонларим келишди. Уларга ҳам транспорт карта керакми?
Мен телефон рақамимни ўзгартирдим. Транспорт картасини янги рақамга қандай боғлаш мумкин?
Мен тариф сотиб олмоқчи эмасман. Бир марталик йўл ҳақини тўлай оламанми?
Транспорт картаси нима?
Ягона транспорт картаси — бу NFC технологиясига эга алоқасиз карта. Унда амал қилиш муддати — уч йил эканлиги кўрсатилган. Карта унда кўрсатилган ой охиригача амал қилади.
Карта 2022 йил декабрь охиригача амал қилади.
Картанинг орқа қисмида QR-код мавжуд. У atto.uz сайтига «олиб киради», у ерда рўйхатдан ўтишингиз ва агар картангиз телефон рақамига боғланган бўлса, унинг маълумотларини билиб олишингиз мумкин.
Ҳозирда транспорт картасидан «Тошшаҳартрансхизмат» компаниясининг автобусларида (яшил автобусларда) ва барча метро станцияларида тўловни амалга ошириш мумкин. Келгусида транспорт картаси имкониятларини кенгайтириш режалаштирилмоқда.
Қандай транспорт карталари мавжуд?
Ҳозирча фақат бир турдаги транспорт картаси мавжуд — аҳоли учун кўк рангли карта.
Янги йилдан бошлаб «Тошшаҳартрансхизмат» ва Тошкент транспорт бошқармаси имтиёзли ҳаракатланиш ҳуқуқига эга бўлган йўловчилар — ўқувчилар, талабалар ва нафақахўрлар учун транспорт карталарини жорий этиши кўзда тутилган. Ушбу карталар тегишли равишда яшил, сариқ ва қизил рангларда бўлади.
Имтиёзли транспорт картаси оддий транспорт картасидан нимаси билан фарқ қилади?
Имтиёзли ҳаракатланувчилар учун транспорт картаси карта эгасининг номига ва йўловчига имтиёзли ҳаракатланиш ҳуқуқини берувчи ҳужжат — нафақа ёки талабалик гувоҳномасига боғланган бўлади.
Муҳим маълумот. 16 ёшга тўлмаган шахсларга қонуний вакилнинг паспорти, боланинг туғилганлиги тўғрисидаги гувоҳнома ва маълумотни тасдиқловчи ҳужжат бўйича транспорт картаси берилади.
«Имтиёзчи"лар учун транспорт картаси тариф режасини 50% чегирма билан — ярим нархда сотиб олиш ҳуқуқини беради.
Транспорт картасини қаердан сотиб олиш мумкин?
Аҳоли транспорт (кўк) карталарини метро чиптахоналаридан ва ойлик йўловчи чипталарини сотиб олиш шаҳобчаларидан харид қилиш мумкин. Шаҳарда 90га яқин шундай шаҳобчалар мавжуд. Ҳозирда бундай чипталар 15 минг сўм туради, шундан 5 минг сўми транспорт картаси балансига ўтказилади.
11 декабрь куни бўлиб ўтган брифингда Транспорт бошқармаси бошлиғи ва «Тошшаҳартрансхизмат» AЖ бошқарув раиси Aнвар Жўраев имтиёзли ҳаракатланувчилар учун транспорт (яшил, сариқ ва қизил) карталарини ойлик йўловчи чипталарни сотиш жойларида (туманлар бўйича шаҳобчалар рўйхати) ёки «Тошшаҳартрансхизмат» офисида олиш мумкинлигини таъкидлади (манзил).
ТШТХ тушунтиришича, «имтиёзчилар» учун карталар метро чиптахоналарида сотилмайди, чунки талабалар ва нафақахўрлар ҳужжатларни тақдим этишлари керак, кассалар эса бир вақтнинг ўзида нафақахўрларни рўйхатдан ўтказишга ва йўловчиларга хизмат кўрсатишга улгурмайди.
Ўқувчилар, талабалар ва нафақахўрлар AТТО акцияси доирасида имтиёзли транспорт карталарини бепул олишади. Улар фақат тариф режасини сотиб олишлари керак. Тариф режалари тўғрисида қуйида маълумот келтирилади.
Транспорт карта балансини қандай тўлдириш мумкин?
Метрополитеннинг барча кассаларида, ойлик йўловчи чипталарни сотиш шаҳобчаларида ва Uzcard компаниясига қарашли инфокиосклар тармоғида. Инфокиоскларда Kapitalbank деб ёзилган. «Капитал Банк»га тегишли инфокиосклар сизга тўғри келмайди. Бу инфокиоскларда транспорт картаси балансини текшириш мумкин, лекин уни тўлдириб бўлмайди.
«Капитал Банк» инфокиоскларини UzCard инфокиоскларидан интерфейс орқали ажратиш мумкин. «Капитал Банк»да фон оқ рангда ва хизмат икки тилда. UzCard кўк фонда ва уч тилда. Инфокиосклар харитаси ATTO Uz (Android, Apple) иловасида «Киосклар» бўлимида, шунингдек atto.uz сайтида мавжуд.
Инфокиоскларда бу жараён қуйидагича амалга оширилади:
Балансни тўлов иловалари, шу жумладан, банк иловалари орқали ҳам тўлдириш мумкин. AТТОнинг сўнгги маълумотларига кўра, ушбу функция қуйидаги дастурларда мавжуд: Click, Payme, Apelsin, MyUzcard, UPay, Ipak Yo’li Mobile, MKB Mobile («Микрокредитбанк»), OSON, Tenge Lite (Tenge bank), Universal Mobile («Универсалбанк»), Ravnaq Bank, InfinBank, Aloqa Mobile, Savdogarbank Mobile, My Uzcard, Davrbank, Hamkor Mobile, Agrobank Mobile, PSB («Ўзсаноатқурилишбанк»).
Тўлов дастурлари орқали карта балансини тўлдириш учун қидирув сатрида лотин ҳарфларида «AТТО» сўзини теринг, транспорт картаси рақамини киритинг.
Балансни шунингдек, ATTO.Uz иловаси (PlayMarket, AppStore) ёрдамида тўлдириш мумкин. Бунинг учун асосий менюда «Балансни тўлдириш»ни танлаш ва банк картасини қўшиш орқали уни иловага боғлаш ёки банк картаси реквизитларини киритиб, уни сақламасдан балансни тўлдириш керак.
Транспорт картаси орқали тўлов қандай амалга оширилади?
Aвтобусда картани мобил ёки стационар валидаторга босиш керак. Одатда бу иш кондукторлар томонидан амалга оширилади. AТТО йўловчилардан бошқа йўловчиларнинг карталари билан адаштириб юбормасликлари учун кондукторларга картани бермасликларини сўрайди.
Метрода картани турникетдаги валидаторга босиш ва яшил белгини кутиш керак. Aгар валидатор экрани қизил рангда ёнса, карта баланси салбий бўлиши ёки карта блокланган бўлиши мумкин. Сариқ ранг, охирги тўловдан 6 дақиқадан кам вақт ўтганини англатади.
Светофорнинг ранглари бизнинг йўриқномамизда тағин ҳам келтирилади, шунинг учун тўлов ҳолатини текширишнинг ушбу усулини «светофор» деб атаймиз.
Картани уйда унутиб қолдирибман. Нима қилишим керак?
Aгар сиз транспорт картангизни уйда унутган бўлсангиз ёки уни чўнтагингизда излашни хоҳламасангиз, йўл ҳақини мобил телефонингиз орқали тўлашингиз мумкин.
Аввало, ATTO.Uz (PlayMarket, AppStore) мобил иловасини юклаб олиш ва ўрнатиш зарур. Кейин дастурда рўйхатдан ўтиш керак. Бунинг учун код билан SMS-хабар келадиган телефон рақамини киритиш керак.
Транспорт картангиз маълумотларини киритганингизда, у ушбу телефон рақамига ва шу қурилмадаги дастур тизимига уланади. Энди картани бошқа қурилмадаги иловага боғлай олмайсиз.
Мобил қурилманинг операцион тизимига қараб, асосий менюда мобил телефон орқали тўлаш усуллари рўйхати келтирилган: «Метрода QR-код орқали тўлаш» ва ОС Android қурилмалари учун «NFC орқали тўлаш» ҳамда iOS қурилмалари учун «Метрода QR-код орқали тўлаш».
Чап томонда — Androidда илова интерфейси, ўнгда — iOSда. SMS Info хизмати уланмаган.
Муҳим маълумот. Aгар транспорт картаси SMS-хабарнома хизматига уланмаган бўлса, метрода ҳам, автобусда ҳам йўл ҳақини мобил телефонингиз билан тўлай олмайсиз.
Aгар сиз тўловни доим мобил телефонингиз орқали амалга оширмоқчи бўлсангиз, SMS-хабарномани фаоллаштиришингиз керак. Айнан шу жойда энг қийин жараён бошланади.
SMS-хабарнома хизматини қандай фаоллаштириш мумкин?
SMS-хабарнома хизмати фойдаланувчилар учун бепул. Барча харажатлар AТТО томонидан қопланади. Уни ойлик йўловчи чипталарни сотиш шаҳобчаларида (туманлар бўйича шаҳобчалар рўйхати), ер усти метросининг кассаларида (айни пайтда Халқа йўлининг барча бекатларида) улаш мумкин.
SMS-хабар хизматини ерости бекатлари кассаларида фаоллаштиришнинг имкони йўқ, чунки кўрсатилган телефон рақамига тасдиқлаш коди билан SMS-хабар келиши керак.
SMS-хабарнома хизматини atto.uz сайтида жойлашув манзиллари кўрсатилган инфокиоскларда ва мобил илованинг «Киосклар» бўлимида фаоллаштириш ҳам мумкин. Муаммо шундаки, барча терминалларда ушбу функция ишламайди ёки терминалларнинг бариси ҳам ишламайди.
AТТО компанияси таъкидлашича, SMS-хабарнома хизматини улашга имкон берадиган деярли барча инфокиосклар сариқ рангга эга ва Капитал Банкга тегишли. Уларда «Капитал банк» ёзилган, лекин улар UzCardга тегишли.
Муҳим: SMS-хабарнома хизматини фақатгина UzCard инфокиосклари орқали ёқтириш мумкин. «Капитал Банк» инфокиоскларини UzCard инфокиоскларидан интерфейс орқали ажратиш мумкин. «Капитал Банк»да фон оқ рангда ва хизмат икки тилда. UzCard кўк фонда ва уч тилда.
Сизга картани қабул қилувчи мослама билан жиҳозланган инфокиоск керак — унга шунчаки карта киритилади холос.
Картани «ютиб оладиган» инфокиоск эмас.
Инфокиоск орқали SMS-хабарнома хизмати шу тарзда фаоллаштирилади:
Мобил телефон орқали тўлов қандай амалга оширилади?
SMS-хабарнома уланди, ATTO.UZ мобил иловаси эса ўрнатилди. Энди тўловни мобил телефонда амалга ошириш мумкин.
Aвтобусда ҳаракатланиш учун телефон орқали тўлаш
Муҳим маълумот. Aгар сизда iPhone бўлса, сиз автобусда телефонингиз билан тўлай олмайсиз.
Автобусда фақат Android телефон билан тўловни амалга ошириш мумкин, чунки тўлов AТТОда Apple маҳсулотларида бўлмаган NFC тизими орқали ўтади. Компаниянинг таъкидлашича, iOS мобил телефонларида NFC уланиши учун Apple компанияси сертификатини олиш зарур. Ушбу жараён AТТОнинг истиқбол режаларидан бири, бироқ у жуда узоқ давом этиши мумкинлиги компания томонидан таъкидланмоқда.
Aвтобусда Android телефони орқали тўлаш учун қуйидагилар керак:
- ATTO Uz иловасини очиш;
- асосий менюда «NFC орқали тўлаш»ни танлаш;
- ва уч дақиқа давомида телефонни орқа томони билан мобил ёки стационар валидаторга босиш.
Тўлов ҳолатини «светофор» усули ёрдамида текширамиз.
Ҳозирча стационар валидаторларнинг ҳаммаси ҳам NFC тўловларини қабул қилмайди. Бунинг учун барча стационар валидаторларнинг дастурий таъминотини янгилаш зарур. AТТО нақд тўловларни бекор қилиш эълон қилинган вақтга келиб, барча қурилмаларни янгилашни ваъда қилмоқда.
Метрода телефон орқали тўлов
Метрода тўловларни Android ва iOS қурилмалари билан амалга ошириш мумкин. Тўлов вариантларини таҳлил қиламиз.
Android қурилмаларида NFC тўловлари
Android қурилмалари метрода NFC ва ноёб QR-код ёрдамида тўлашга имкон беради. Бунинг учун Интернет зарур. Aгар сиз Metrotelecom абоненти бўлмасангиз (метро станцияларининг ер ости йўлакларида интернетга кириш имкони йўқ), унда баъзи операцияларни ер устида бажариш керак.
NFC орқали тўловни амалга ошириш учун қуйидагилар керак:
- AТТО дастурини очиш — ер устида;
- асосий менюда «NFC орқали тўлаш»ни танлаш — ер устида;
- телефоннинг орқа қисмини турникетдаги валидаторга босиш учун сизда уч дақиқа вақт бўлади.
Metrotelecom абонентлари метронинг ер ости метро йўлакларида дастлабки икки қадамни бажаришлари мумкин. Ерусти йўлакларда барча функциялар фаол интернет билан ишлайди.
Метро йўл ҳақини QR-код орқали телефонда тўлаш — Android ва iOS
QR-код орқали тўлов фақат метрода, Android ва iOS мобил қурилмаларида ишлайди.
QR-код орқали тўлаш учун ҳам интернетга уланиш талаб қилинади. Aгар сиз Metrotelecom абоненти бўлмасангиз, операцияларнинг бир қисми ер устида бажарилиши керак.
QR-код орқали тўловни амалга ошириш учун қуйидагилар керак:
- AТТО дастурини очиш — ер устида;
- асосий менюда «Метрода QR-код орқали тўлаш»ни танлаш, сўнгра метро станцияларидан бирини танлаш — ер устида;
- мобил телефонингиз экранидаги QR-кодни турникетдаги QR-код ридерига кўрсатиш учун сизда уч дақиқа вақт бўлади.
Турникетдаги QR-код ридери (ўқиш мосламаси) юқоридаги кўк рангли доирада, унинг остида валидатор жойлашган.
Metrotelecom абонентлари метронинг ер ости метро йўлакларида дастлабки икки қадамни бажаришлари мумкин. Ерусти йўлакларда барча функциялар фаол интернет билан ишлайди.
Муҳим маълумот. Метро учун QR-кодлари фақат танланган метро бекатида амал қилади.
Мен транспорт картамни йўқотиб қўйдим. Унда жуда кўп пул бор эди. Нима қилишим керак?
Картани блоклаш. 78−140−08−08 телефон рақамига — Қўллаб-қувватлаш хизматига қўнғироқ қилишингиз мумкин. Ёки картани ATTO.Uz иловасида блоклаш мумкин. Картани топган киши блокланган карта билан тўлов қила олмайди.
Муҳим маълумот. Aгар сизнинг картангиз ATTO.Uz иловасига боғланмаган бўлса, картани топган шахс уни мустақил боғлаши мумкин. Транспорт карталарини ATTO.Uz иловасига фақат битта қурилмада улаш мумкин. Aгар сиз мобил иловадан фойдаланишни хоҳламасангиз, хавфсизлик мақсадида SMS-хабарнома хизматини ёқишингиз мумкин. Шунда транспорт картаси йўқолган тақдирда, уни топган киши, SMS-хабарнома хизмати уланган телефон рақамига юбориладиган кодни киритмаса, картани ATTO.Uz иловасида рўйхатдан ўтказа олмайди.
Муҳим маълумот. Илова орқали картани блоклаш учун унинг баланси 1400 сўмдан кам бўлмаслиги керак, акс ҳолда очиладиган менюда «Блоклаш» функцияси пайдо бўлмайди.
Пул маблағларини янги картага қайтариш учун AТТО офисига (жойлашув) боришга тўғри келади. Aммо компанияда буни вақтинчалик дейишмоқда.
Яқинда фойдаланувчилар маблағни картадан картага ўтказа оладилар, кейин пулни қайтариш учун офисга боришнинг ҳожати бўлмайди.
Картани блокдан чиқариш учун очиладиган менюда «Блокдан чиқариш»ни танлаш лозим.
Менда смартфон йўқ. Балансимни қандай билишим мумкин ёки йўқолган тақдирда картани блоклашим мумкинми?
Aгар сиз транспорт картангизни йўқотиб қўйсангиз, AТТО Call-маркази — 78−140−08−08 рақамига мурожаат қилинг. Балансни Инфокиоскларда (инфокиосклар харитаси atto.uz сайтида мавжуд), барча метро чиптахоналарида, ойлик чипталарни сотиш шаҳобчаларида ёки AТТО Call-марказларига қўнғироқ қилиш орқали билиш мумкин.
Менинг картам ишдан чиқди. Нима қилиш керак?
Картанинг ишламай қолиши икки сабабга кўра содир бўлиши мумкин: карта механик таъсир туфайли ёки электромагнит ҳамда ҳарорат таъсирида шикастланган.
Транспорт карталари фойдаланувчилари карталарни сақлаш ва улардан фойдаланишда эҳтиёт бўлишлари даркор.
Картани мобил телефон, маиший ва офис жиҳозлари билан бирга, шунингдек металл буюмлар ва бошқа магнит ташувчилар / қурилмалар ёнида сақлаш тавсия этилмайди. Булар жаҳон стандартининг қоидалари.
Aгар транспорт картаси барибир бузилган бўлса, картани алмаштириш бўйича кўрсатмалар олиш учун AТТО Call-маркази — 78−140−08−08 рақамига мурожаат қилиш керак. Бузилган транспорт картасини алмаштириш учун фойдаланувчи биринчи марта мурожаат қилганида янгиси бепул тақдим этилади. Эски картадаги маблағ янгисига ўтказилади.
Қисқа муддатга меҳмонларим келишди. Уларга ҳам транспорт карта керакми?
Aгар меҳмонлар транспорт картасини сотиб олишмаса, ҳар бир йўловчи учун тўловлар оралиғида 6 дақиқа кутиш керак бўлади. Дастлаб, бу йўловчи тасодифан йўл ҳақини икки марта тўламаслиги учун зарур бўлган.
Бошқа сабаблари ҳам бор. AТТО компаниясида бу ҳақда қуйидаги изоҳ келтирилди:
«Биз картага инсоннинг шахсий воситаси сифатида қараймиз. Aгар Сизда қоғоз ҳаракатланиш чиптаси бўлса, ундан икки ёки уч киши бир вақтнинг ўзида фойдаланмайди. Aгар транспорт картаси ҳар бир йўловчининг транспорт учун тўлашнинг индивидуал воситаси сифатида шаклланмаса, режалаштирилган чексиз ва кўчма тарифларининг функционаллиги деярли имконсиз бўлади».
Бундан ташқари, AТТО мутахассислари жамоат транспортидан фойдаланишни таҳлил қилиш ва ушбу маълумотларни транспорт департаментига тақдим этиш учун йўловчилар қандай ҳаракатланаётганини кўришлари керак, бу эса ўз навбатида янги йўналишларни очади, йўлни ўзгартиради, фойдасиз йўналишларни ёпади ва янги тариф режаларини жорий қилади.
Компанияда, транспорт карталаридан бир вақтнинг ўзида бир нечта йўловчиларнинг фойдаланиши статистикани бузади, дейилмоқда.
Транспорт тўловлари орасида 6 дақиқа нима дегани? Aгар икки дақиқадан сўнг бошқа автобус ёки метрода бўлсам, унда нима бўлади?
Тўловлар орасидаги 6 минутлик чеклов битта валидатор орқали амалга оширилган тўловларга қўлланилади. Уч эшикли автобусларнинг аксарияти аллақачон битта стационар валидатор билан жиҳозланган, ҳар бир кондуктор мобил валидаторга эга. Ҳозирги кунда бир йўналишнинг стационар ва мобил валидатори эндиликда турли хил қурилмалар ҳисобланади. Aслида, бир автобусда турли хил валидаторлар орқали икки кишилик тўлов амалга оширилиши мумкин.
AТТО уч эшикли автобусларнинг барча эшикларига стационар валидаторлар ўрнатилганда, битта валидатор асосий, қолган иккитаси эса қўшимча сифатида қабул қилинишини хабар қилди.
Муҳим маълумот. Метрополитенда 6 дақиқалик лимит ҳам битта валидаторга тегишли. Aгар йўловчи валидаторда муваффақиятли тўлов (яшил тасдиқ белгиси)ни кўрса, унда транзакция муваффақиятли бўлган. Турникетнинг қотиб қолиши тўлов амалга ошмаганлигини билдирмайди. Картани бошқа валидаторга босишнинг кераги йўқ — бунда сиз икки маротаба йўл ҳақини тўлайсиз. Метро назоратчиси йўловчини бошқа турникетга йўналтирмасдан, уни карта босилган турникет орқали ўтказиши керак. Навбатчи назоратчига тўлов муваффақиятли амалга оширилганлигини транспорт / банк картасини ёки телефонни очилмаган турникетдаги валидаторга қайта босиб исботлаш мумкин. Валидатор экранида йўл ҳақи тўловининг аниқ вақти кўрсатилади.
Мен телефон рақамимни ўзгартирдим. Транспорт картасини янги рақамга қандай боғлаш мумкин?
Дастлаб, учта нуқтани босиш йўли билан картани иловадан ўчиринг.
Иловани ўчириб ташланг ва янги телефон рақамига рўйхатдан ўтиш орқали қайта уланг. Транспорт картани рўйхатдан ўтказинг.
SMS-хабарнома хизматини янги телефон рақамига улаш учун инфокиоскда SMS-хабарномани ўчиринг ва уни қайта уланг.
Тариф режалари
1 январдан бошлаб Тошкент транспорт бошқармаси 5, 10, 15, 20 ва 30 кунлик тариф режаларини жорий қилмоқда.
Муҳим маълумот. Январь ойида фақат 30 кунлик тариф режасини харид қилиш мумкин бўлади.
30 кунлик тариф режаси ойлик чипта нархига тенг:
- 166 минг сўм — имтиёзли ҳаракатланиш ҳуқуқига эга бўлмаган аҳоли учун — автобусва метро;
- 120 минг сўм — имтиёзли ҳаракатланиш ҳуқуқига эга бўлмаган аҳоли учун — автобус.
- 83 минг сўм — нафақахўрлар, талабалар ва ўқувчилар учун — автобус ва метро.
- 60 минг сўм — нафақахўрлар, талабалар ва ўқувчилар учун — автобус.
Тариф режаларидан фойдаланишда ҳаракатланиш ва транспортдан транспортга ўтишлар сони чекланмайди. Aммо бу бир вақтнинг ўзида бир нечта йўловчилар учун ҳақ тўлаш мумкинлигини англатмайди. AТТО таъкидлашича, бугунги кунда бир неча киши бир ойлик йўл чиптасидан ҳам фойдалана олмайди.
Тасаввур қилайлик. Сизда транспорт картаси бор ва 5 кунлик тўплам сотиб олинган. Дўстингиз билан автобусга чиқдингиз ва икки киши учун битта транспорт картаси билан тўламоқчи бўлдингиз. Сиз картани мобил ёки стационар валидаторга босиб, ўзингиз учун йўл ҳақини тўладингиз. Aгар 6 дақиқадан сўнг сиз худди шу валидаторга картани босиб, дўстингиз учун ҳам тўламоқчи бўлсангиз, картангиздан 1400 сўм ечиб олинади. Aгар балансда маблағ бўлмаса, карта қора рўйхатга киритилади. Aммо, агар сиз картани ўша автобусдаги бошқа валидаторга боссангиз, у ҳолда тўлов тариф режаси доирасида ҳисобланади.
Метрода ҳам худди шу қоида қўлланилади, чунки ҳар бир турникет қолганларидан мустақил валидатор ҳисобланади.
Муҳим маълумот. Ойнинг биринчи кунидан охирги кунигача фойдаланишга мўлжалланган анъанавий йўловчи чипталаридан фарқли ўлароқ, транспорт карталарининг тариф режалари биринчи тасдиқлаш кунида (н) фаоллаштирилади.
Бу нимани англатади?
Aйтайлик, сиз 1 январь куни 30 кунлик тариф режасини сотиб олдингиз, аммо 15 январгача жамоат транспортидан фойдаланишни бошламайсиз. Демак, 15 январь — бу биринчи тасдиқлаш куни ва тариф 15 февралда тугайди.
Мен учун тариф режасини сотиб олиш ҳар доим ҳам фойда келтирмайди. Бошқа тўлов йўллари борми?
Ҳа. Шунчаки транспорт карта балансини тўлдиринг ва йўл ҳақини белгиланган тариф бўйича тўланг — ҳар бир манзил учун 1400 сўм.
Тариф режасини олдиндан сотиб олиб, уни ёқишдан олдин белгиланган тариф бўйича тўлай оламанми?
Йўқ. Aгар сиз 5, 10, 15, 20 ёки 30 кунлик тариф режасини сотиб олган бўлсангиз, сизда белгиланган тариф бўйича тўлов режимига ўтиш имкони йўқ.
Мен талаба / нафақахўр / мактаб ўқувчисиман. Йилнинг фақат маълум ойларида тариф режасини сотиб олиш мен учун манфаатли. Демак, мен бир марталик йўл ҳақини — ҳар бир манзил учун 1400 сўм тўлашим учун аҳоли кўк картасини сотиб олишим керакми?
Имтиёзли карта учун тариф режасини сотиб олиш шарт эмас. У ҳам 1400 сўм тўланиши орқали аҳоли оддий картаси каби бир хил тарзда ишлатилиши мумкин.
Муҳим маълумот. Нафақахўрлар, талабалар ва ўқувчилар учун транспорт карталарининг фақат тариф режаларида 50% чегирма мавжуд. Aгар сиз имтиёзли транспорт картаси учун тариф режасини сотиб олмасангиз, у ҳолда белгиланган тариф бўйича — 1400 сўм тўлайсиз.
AТТО буни бугунги кунда нафақахўрлар, талабалар ва мактаб ўқувчилари фақат ойлик чиптани сотиб олишда имтиёзга эга эканлиги билан изоҳладилар. Бир марталик тўлов амалга оширилганда бу тоифадаги фуқаролар белгиланган тариф бўйича тўловларни амалга оширадилар.
Жуда муҳим. Сиз ATTO.Uz мобил иловасида NFC ва QR-код орқали кунлик тариф режаларида йўл ҳақини тўлай олмайсиз. Оператор буни тариф режасини сотиб олган йўловчининг йўл ҳақини телефон орқали тўлаши мумкинлиги, транспорт картасини эса бошқасига бериши мумкинлиги билан изоҳлайди. Шунингдек, ҳозирча тариф режаларини банк картасига боғлаб бўлмайди. Бу функция кейинги йил пайдо бўлиши мумкин.
Мен тариф сотиб олмоқчи эмасман. Бир марталик йўл ҳақини тўлай оламанми?
Ҳа. 1400 сўмлик бир марталик йўл ҳақини юқорида ёки қуйида кўрсатилган ҳар қандай қулай усулда тўлашингиз мумкин.
Мен транспорт картасини сотиб олишни хоҳламайман. Контактсиз йўл ҳақини тўлашнинг бошқа усуллари борми?
Бор! Сиз Humo, Visa, MasterCard ва бошқа контактсиз банк карталари билан метрода ва автобусда йўл ҳақини тўлашингиз мумкин. AТТО автобуслардаги барча стационар валидаторлар банк карта тўловларини қабул қилишини таъкидлади. Мобил валидаторларда баъзан носозликлар кузатилади. Муаммо ҳал қилинмоқда. Метрода алоқасиз банк карталари билан йўл ҳақини тўлашда муаммолар йўқ.
Муҳим маълумот. Стационар валидаторлар фақат уч эшикли автобусларда мавжуд.
QR коди ёрдамида телефон орқали метрода тўлов — Click Pass, PaymeGO
QR-код билан тўловни Click ва Payme тўлов иловалари орқали ҳатто офлайн режимда тўлашингиз мумкин. Шунчаки, QR-кодини олиш учун Click Pass ёки Payme GOни танланг ва смартфон экранидаги QR-кодни турникетдаги QR-код-ридерга кўрсатинг.
Payme ходимларининг хабар беришича, ҳозирча тизим Буюк Ипак Йўли ва Ҳамид Олимжон метро бекатларида ишлаяпти. Бир неча ой ичида компания бошқа бекатларни ҳам қамраб олади.
Click компаниясининг таъкидлашича, ҳозирча Click Pass орқали тўловни фақат Олой бозори йўлагидаги Aбдулла Қодирий метро бекатида тўлаш мумкин. Бошқа бекатларни қамраб олиш ишлари олиб борилмоқда.
QR-код-ридер кўк доирачада.
Ҳозирда Тошкент транспорт бошқармаси Kalyon Ulaştırma транспорт компанияси билан биргаликда пойтахт учун транспортнинг бош режасини яратиш ва трансфер тариф режалари концепциясини тайёрлаш устида ишламоқда (улар билан транспортдан транспортга ўтиш арзонроқ бўлади).
