АҚШ Озиқ-овқат ва дори-дармон маъмурияти (FDA) Pfizer-BionTech вакцинасини фавқулодда қўллашга рухсат берди. Вакциналар билан 16 ва ундан катта ёшдагилар эмланиши мумкин.
Администрация шу йилнинг охирига қадар 20 миллионга яқин тиббиёт ходимлари ва қариялар уйларида яшовчилар ва ишловчиларни коронавирусга қарши эмлашга эришмоқчи. Pfizer компаниясининг АҚШ ҳукумати билан келишувига кўра, мамлакатга март ойигача 100 миллион дона вакцина етказиб берилади. Ушбу келишувга кўра, вакциналар бепул тарқатилиши режалаштирилган.
Бундан ташқари, АҚШ тез орада Moderna вакцинасини қўллашга ҳам рухсат бериши мумкин, олдинроқ ҳукумат ушбу вакцинага ҳам 100 миллион доза буюртма бергани маълум бўлганди.
Президент Трамп FDA маъмуриятини жуда секин ишлаётганликда айблаган эди. Оқ уй коронавирусга қарши вакцинани ишлатишга тезроқ рухсат беришга чақирган, акс ҳолда агентлик раҳбари ишдан ҳайдалиши ҳақида огоҳлантирган эди.
Маълумот учун, олдинроқ Буюк Британия Pfizer вакцинасини қўллашга рухсат бергани ҳақида хабар берган эдик.
