1 октябр куни Тошкентнинг Мирзо-Улуғбек тумани Оққўрғон маҳалласида яшовчи шахс ўз хотинини калтаклаб, ўлдириш билан таҳдид қилиб, унга боланинг нажасини ейишга мажбур қилди. Бундан ташқари, эркак қизини содир бўлаётганларни камерада суратга олишга мажбур қилди.
Жабрланувчининг ҳодиса ҳақидаги ҳикояси ҳамда видеоёзув зўравонликка қарши «Немолчи.Уз» («Сукут сақлама») лойиҳаси томонидан эълон қилинди.
Маълум қилинишича, эркак 14 йил давомида хотини ва болаларини мунтазам равишда калтаклаб, психологик ва иқтисодий зўравонликларга дучор қилиб, хўрлаган.
«Бу йиллар қўрқув ва доимий зўравонлик остида ўтди. У мени ва болаларни калтаклади, масхара қилди ва қийнади. Кўпинча зарбалар бошимга тушарди ва бир неча бор миям чайқалди. У касалхонага боришни тақиқлади, уйда ўзим даволандим. Натижада — доимий равишда чидаб бўлмас бош оғриғи. Маҳалла ва қариндошларим уни кечиришга кўндиришди ва мен ўзим ва болаларим ҳаёти ва саломатлигидан доимий қўрқув билан яшаб келдим», — дея аёлнинг сўзларидан иқтибос келтиради «Немолчи.Уз».
Жабрланувчининг сўзларига кўра, отаси вафот этганидан сўнг, эри уни онасининг квартирасини сотишга мажбур қилган, кекса аёлга сотилган квартира нархинг ярмига четроқдан квартира олиб берган. Онасининг вафотидан кейин эса иккинчи квартирасини ҳам сотган. Аёлнинг таъкидлашича, эри мулкни меросхўр бўлишини кутмасдан сотган ва пора билан жараённи тезлаштирган.
«У буни мени ўлдириш ва калтаклаш билан қўрқитиш орқали амалга оширди. Бу пул қаерга кетди — билмайман, — дея тан олди аёл. — Пулни қайтариб беришни сўраганимда, мен қоғозларга ўзим имзо чекканимни айтди ва у мени мажбурлаганини исботламайман… Менда бошпана йўқ. Табиийки, у менга ишлашга имкон бермади. Мен у билан битта том остида қолишим керак эди».
Унинг айтишича, сўнгги йилларда у эрида ғалати хатти-ҳаракатларни — тартибсиз нутқни, маст юришни, кайфиятнинг тўсатдан ўзгаришини, асоссиз тажовузларни кўришни бошлади. Унинг сўзларига кўра, у спиртли ичимлик ҳидини сезмаган. Бу ҳолатида у уни ва вояга етмаган қизини бир неча бор калтаклаган.
«2020 йил 1 октябрь мен учун ҳеч қачон унутмайдиган кун бўлди! Ўша куни майда-чуйда нарсаларни баҳона қилиб, мени ваннахонага олиб кирди ва ҳар доимгидек, ўлдираман деб қўрқитиб, мени кичкина қизимнинг тувакдаги нажасини ейишга мажбур қила бошлади. Шу билан бирга, тўнғич қизининг сочларидан чангаллаб, тепиб, уни ва онасини ўлдираман деб қўрқитиб, кадр ортида қолишга уриниб, содир бўлаётган барча воқеаларни видеога олиш ва изоҳлашга мажбур қилди», — дейилади хабарда.
Аёлнинг айтишича, эри ошхона тахтаси билан унинг қовурғасига урган, орқасига санчқи санчиб, тез орада ўлишини айтган ва кўкракларига қаттиқ зарбалар берган. Буларнинг барчаси болаларнинг (катта қизи 12 ёшда, кенжаси — 3 ёшда) кўз ўнгида содир бўлган. Тахқирлаш қўшниларни чақириб, ялангоёқ қочиб қутулгунча 2,5 соат давом этган.
1 октябрь куни аёлга етказилган жароҳатлар.
«Шундан сўнг биз тез ёрдам ва милиция чақирдик, лекин у эшикни очмади. Шундай қилиб, биз кўчада қолдик. Қариндошларимиз бизни олиб кетишди, биз 4 кун кийимсиз ўтирдик. Квартирага фақат 6 октябрь куни милиция ва маҳалла ёрдамида кириш мумкин бўлди. Бунгача у ҳеч кимга эшикни очмаган», — деди аёл.
ИИББ изоҳи
Тошкент ИИББ мазкур ҳолат бўйича изоҳ берди.
Қайд этилишича, ушбу видео 1 дан 2 октябрга ўтар кечаси суратга олинган. Худди шу кечаси 102 рақамига аёл эри, 46 ёшли Рустам И. томонидан калтаклангани ва таҳқирлангани тўғрисидаги хабар келиб тушган. Аёлга етказилган жароҳатларнинг оғирлигини аниқлаш учун суд-тиббий экспертиза тайинланган.
Мазкур ҳолат бўйича Мирзо Улуғбек тумани ИИБ ҳузуридаги тергов бўлими томонидан Ўзбекистон Жиноят кодексининг 110-моддаси 1-қисми («Қийноққа солиш») бўйича жиноят иши қўзғатилди. Рустам И. ҳибсга олинган. Тергов давом этмоқда.
7 октябрь куни жабрланувчига ҳимоя ордери тақдим этилган. Ҳозирда аёл ва унинг вояга этмаган болалари хотин-қизларни реабилитация қилиш ва мослаштириш марказига вақтинча жойлаштирилган.
Аввалроқ «Газета.uz» 25 ёшли аёл турмуш ўртоғи томонидан мунтазам равишда оилавий зўравонликка дучор бўлган шунга ўхшаш ҳодиса ҳақида ёзган эди. Унга нисбатан Жиноят кодексининг 105-моддаси (қасддан тан жароҳати етказиш) билан жиноят иши қўзғатилган.
