Қирғизистонда 4 октябрь куни еттинчи чақириқ Жогорку Кенеш депутатлигига сайловлар бўлиб ўтди. Сайловларда 16 та сиёсий партия ўринлар учун кураш олиб борди, дея хабар берди 24.kg ахборот агентлиги.
Дастлабки маълумотларга кўра, фақат тўртта сиёсий партия бир палатали парламентга кириш учун 7 фоизлик тўсиқни енгиб ўтишга муваффақ бўлди. Улар:
- «Биримдик» (24,53%) — 46 та ўрин;
- «Мекеним Кыргызстан» (23,9%) — 45 та ўрин;
- «Кыргызстан (8,74%) — 16 та ўрин;
- «Бутун Кыргызстан» (7,09%) — 13 та ўрин.
Сайловларни ўтказиш учун 2475 та сайлов участкаси очилди, 97,25 фоиз овозлар ҳисоблаб чиқилди, дея хабар берди МСК. Қолган участкаларнинг аксарияти чет элда жойлашган. Аҳолининг сайловда иштирок этиш кўрсаткичи эса 56,2 фоизни ташкил этди.
Парламентга кира олмаган бешта партия бирлашишини эълон қилди. «Реформа», «Ордо», «Мекен Ынтымагы», «Чон казат» ва «Ыйман нуру» сайлов натижаларини тан олишдан бош тортишди ва биргаликда ҳаракат қилишга келишишди.
5 октябрь куни Бишкекда овоз бериш натижаларидан норози бўлган партиялар ва уларнинг тарафдорларининг бир неча тинч митинглари бўлиб ўтди.
