Uzbekistan Airways ҳали лоукостер яратиш ниятида эмас. Бу ҳақда 5 октябрь куни Сенатнинг Бюджет ва иқтисодий ислоҳотлар қўмитаси йиғилишида компания раисининг биринчи ўринбосари в. б. Умид Ҳусанов маълум қилди.
2018 йил февраль ойида Умид Хусанов лоукостер энди қайта ташкил этилган «Ўзбекистон ҳаво йўллари»нинг шўъба корхонасига айланишини маълум қилган эди. «Ўйлайманки, ушбу масала бу йил ёпилади», — дея таъкидлаган эди у.
«Ҳа, биз миллий авиакомпания негизида лоукостер яратишни режалаштирган эдик. Биз режаларимизни қайта кўриб чиқиб, ушбу гуруҳни ҳали яратмасликка қарор қилдик. Ҳозирча бизнинг режаларимиз бор — биз Uzbekistan Airwaysнинг ривожланиш стратегиясини ишлаб чиқдик», — деди авиакомпания раисининг биринчи ўринбосари в. б.
Эслатиб ўтамиз, шу йилнинг январь ойида бош вазир Абдулла Арипов мамлакат ичкарисида «мавжуд нархларга қараганда анча арзонроқ» мунтазам парвозларни йўлга қўйиши керак бўлган Humo Air давлат авиакомпанияси ташкил этилишини эълон қилган эди. Ҳукумат қарори билан устав капиталига 43 та АН-2 самолётлари, самолёт двигателлари ва бошқа жиҳозларни олган янги авиакомпаниянинг бизнес модели ва ривожланиш стратегиясини ишлаб чиқиш бўйича кўрсатма берилганди.
Июль ойида Ўзбекистон ва Россия қўшма лоукостер яратиш масаласи муҳокама қилинди, аммо бундан кейин ҳеч қандай янгилик бўлмади.
Бундан ташқари, Умид Ҳусанов тариф сиёсати қайта кўриб чиқилганини, унинг натижалари пандемиядан кейин маълум бўлишини айтди.
«Биз тариф сиёсатимизни қайта кўриб чиқдик. Нархлар харажатларга боғлиқ. Бугун бу сир эмас. Ушбу пандемия доирасида биз таннарх тузилишини, харажатларни камайтиришни тўлиқ ишлаб чиқдик. Ҳозирда биз ўйлаган аниқ чора-тадбирлар мавжуд. Мен ҳозир рақамларни эълон қилмайман, аммо биз харажатларни камайтириш учун барча чораларни кўрдик. Умид қиламанки, пандемиядан кейин тўлиқ ишга тушганимиздан сўнг натижа бўлади ва чиндан ҳам йўловчилар буни кўришади», — деди у.
