Тошкент вилоятида COVID-19 билан касалланганлар билан мулоқотда бўлган фуқаролар учун қўшимча ўринлар тайёрланмоқда, дея хабар қилди Миллий гвардия матбуот котиби Даврон Жуманазаров пайшанба куни АОКАда бўлиб ўтган брифингда.
Унинг сўзларига кўра, фуқаролар сиҳатгох, дам олиш масканлари, соғломлаштириш лагерлари, коллежлар ва лицейлар ётоқхоналарига жойлаштирилади. Уй шароитида даволанаётган беморларга эса тиббий хизмат кўрсатиш, уларга зарурий озиқ-овқатлар, иммунитетни кўтарувчи дори-дармонлар ва бошқа зарурий эҳтиёж молларини етказиб бериш мақсадида вилоятда 31 та мобил гуруҳлари ташкил этилди.
Вилоят бўйлаб Миллий гвардия, Фавқулодда вазиятлар ва Мудофаа вазирлиги ҳамда Санитария-эпидемиология назорати давлат инспекцияси вакилларидан ташкил топган 44 та гуруҳ 17 турдаги махсус техникалар шунингдек, 482 нафар кўнгилли (волонтёр) жалб этилган ҳолда кунига ўртача 315 та объектда (262 801 кв. метр майдонда) дизенфекция ишлари олиб борилмоқда.
Матбуот котибининг қайд этишича, Нурафшон шаҳрида 24 соатлик режимда фаолият олиб борувчи мувофиқлаштириш тезкор штаби ташкил этилган. Карантин талабларига риоя этилишини таъминлаш мақсадида жами 3 310 нафар Миллий гвардия ва ички ишлар органлари ходимлари жалб этилган.
