Вазирлар Маҳкамасининг қарорига биноан Ўзбекистондаги таниқли блогер ва Масс-медиа фонди директори Хушнудбек Худойбердиев Ўзбекистон миллий ахборот агентлиги бош директорининг ўринбосари этиб тайинланди. Бу ҳақда Миллий масс-медиани қўллаб-қувватлаш ва ривожлантириш жамоат фонди васийлик кенгаши раиси Комил Алламжонов ўзининг Telegram саҳифасида хабар берди.
«ЎзА бош директорининг ўринбосари этиб тайинланган блогер ва Масс-медиа фонди директори Хушнудбекни янги масъулиятли лавозим билан табриклайман. Бирга жуда самарали меҳнат қилдик. Ишонаманки, сизнинг ҳаракатларингиз билан ЎзА янги даражага кўтарилади. Сиз у ташкилотга ҳақиқий янги қон бўлиб кираётганингизга ишонаман. Янгилик қилиш осон бўлмайди, тайёр туринг. Омад!», — дея Алламжонов уни янги тайинлов билан табриклади ўз хабарида.
«Газета.uz» манбасининг таькидлашича, Хушнудбек Худойбердиев Масс-медиа фондининг директори лавозимини тарк этади.
Хушнудбек Худойбердиев 1989 йили Қашқадарё вилоятининг Чироқчи туманида туғилган. 2010 йили Тошкент Давлат юридик институтининг бакалавриат, 2012 йили эса магистратура босқичини тамомлаган.
2004 йилдан буён «Заковат» интеллектуал клубининг аъзоси. Сўнгги 10 йилда 8 марта Олий лига финалида иштирок этиб, улардан 4 тасида жамоаси билан чемпион бўлган. 2016 йили «Ўзбекистон белгиси» кўкрак нишони билан тақдирланган.
Маълумот учун, ЎзА бош директори ва унинг ўринбосарлари президент билан келишилган ҳолда Вазирлар Маҳкамаси томонидан тайинланади ва лавозимидан озод қилинади.
Эслатиб ўтамиз, 2019 йилнинг декабрь ойида ЎзА президентининг қарори билан вазифалар қайта кўриб чиқилиб, агентлик қошида маслаҳат кенгаши ва медиа-марказ ташкил этилган. Февраль ойида эса ЎзА томонидан ишлаб чиқилган ҳукумат қарори лойиҳаси муҳокамага қўйилган эди. Унда, агентликка ускуналар сотиб олиш ва янги портални ишга тушириш учун 5,4 млрд сўм ажратиш таклиф қилинганди.
