TikTok ва YouTube`да Sardor gangster тахаллуси билан чиқишлар қилган блогер 10 суткага қамалди. У майда безорилик ҳамда миллий, ирқий, этник ёки диний адоватни тарғиб қилувчи материалларни тайёрлаш каби ҳуқуқбузарликларни содир этган деб топилди.
Аввалроқ 15 сутка маъмурий қамоқ жазоси тайинланган диний блогер Аброр Мухтор Алий (Аброр Абдуазимов) озодликка чиқди. Олий суднинг назорат органи унинг қамоқ муддатини икки суткага қисқартирди.
Нишон тумани суди блогер Абдулҳаким Абжалиловни товламачиликда айбдор деб топиб, 5 йил муддатга озодликдан маҳрум этиш жазосини тайинлади.
Қаршидаги манзил колонияда Отабек Сатторий билан учрашган «Эзгулик» жамияти аъзоси Абдураҳмон Ташанов блогер «апрель охири, майнинг бошларида» озодликка чиқиши мумкинлигини маълум қилди. Блогер озодликка чиққач, «тинчгина ахборот технологиялари соҳасида ишламоқчи» эканини айтган.
Фарғона вилоят суди Олимжон Ҳайдаровга нисбатан чиқарилган ҳукм устидан берилган апелляция шикоятини қаноатлантирмади. 1 декабрда блогерни 8 йилга озодликдан маҳрум қилиш тўғрисидаги ҳукм ўзгаришсиз қолди.
Блогер, Шаҳрихон тумани тиббиёт бирлашмаси қабулхона-диагностика бўлими мудири вазифасида ишлаган Отабек Ахлиддиновга 7 йил 1 ой озодликдан маҳрум қилиш жазоси тайинланди. У товламачилик ва талон-торож қилиш қилишда айбли деб топилган.
Эмине Караманова тахаллуси билан танилган блогер Лемара Мирзаахмедовага нисбатан 7,5 йилга озодликдан маҳрум қилиш жазоси тайинланди. У туҳмат, ҳақорат қилиш ва товламачилик жиноятларида айбли деб топилди. Бир эпизод бўйича жабрланувчи Янгийўл тумани ҳокимлиги ходими экани айтилмоқда.
6,5 йилга қамалган блогер Отабек Сатторий умумий тартибли колониядан манзил колонияга ўтказилди.
2022 йил бошида 7,5 йиллик қамоқ жазосига ҳукм қилинган блогер Фозилхўжа Орифхўжаев озодликка чиқди.
8 йилга қамалган блогер Олимжон Ҳайдаров биринчи инстанция судининг қарори устидан апелляция беради, деб маълум қилди унинг укаси. У ўзига қўйилган айбловларни бутунлай рад этади.
Жиноят ишлари бўйича Фарғона туман суди блогер Олимжон Ҳайдаровга 8 йил муддатга озодликдан маҳрум қилиш жазоси тайинлади. У туҳмат, ҳақорат қилиш ва товламачилик жиноятларини содир этганликда айбдор деб топилди. Тайинланган жазони умумий тартибли колонияларда ўташ белгиланди.
Блогер Фарҳод Манноповнинг вафоти билан боғлиқ жиноят иши айблов хулосаси билан судга юборилди. Жиноят иши доирасида 2 нафар шахсга нисбатан айб эълон қилинган.
Абдуқодир Мўминов иши бўйича суднинг иккинчи кунида 8 нафар жабрланувчининг кўрсатмаси тингланди. Блогер мурожаатчиларнинг муаммосини ёритиш учун пул олганига изоҳ берар экан, «текин ишласак, қандай ишлаймиз?» деди. Айбланувчининг онаси эса ҳозирча суд ишидан қониқиш ҳосил қилаётганини айтмоқда.
Қозоғистон президенти блогерларни реклама ёрлиғини қўйиш ва даромадларидан солиқ тўлаш мажбуриятини юкловчи қонунни имзолади. Шунингдек, улар сохта хабарлар тарқатгани учун жаримага тортилади.
Қашқадарё вилоятида 3 нафар блогерга майда безорилик, ички ишлар ходимларининг қонуний талабларини бажармаслик ва бошқа моддалар бўйича 5 суткадан маъмурий қамоқ жазоси тайинланди. Жамоатчилик буни «мантиқсиз ва ноқонуний» дея атаб, Олий суддан асослантирилган изоҳ беришни сўради.
Яккабоғда бир ойлик армияга одам топиш бўйича йиғилишни ёритмоқчи бўлган блогер Элмурод Одиловнинг ИИО ходимлари томонидан калтаклангани айтилмоқда. У йиғилиш ўтказилиши керак бўлган пилла қабул қилиш омборхонасида фермерлар ишига аралашганликда айбланиб 15 суткага қамалди.
Дин ишлари бўйича қўмита Activist блогерининг аҳоли ўртасида ихтилоф ва тушунмовчиликлар келтириб чиқариши мумкин бўлган ғояларни тарқатган, деган хулоса бергани маълум қилинди. Фатво маркази блогер келтирган кармин моддаси мавжуд маҳсулотларни истеъмол қилиш жоизлигини билдирди.
ССВ вайнер Фарҳод Манноповнинг ўлими юзасидан Star Med Center клиникасида ўтказилган текширув натижаларини эълон қилди. Хусусан, беморга тиббий хизмат кўрсатишда қатор лицензия талаб ва шартлари бузилгани, уни операция қилган шифокорда малакавий тоифа бўлмагани аниқланди.
Ички кийимлар дўконини танқид қилган чирчиқлик блогер жаримага тортилди. Бу ишни «ўзининг диний қарашларидан келиб чиқиб» қилганини айтган фуқарога тадбиркорлик фаолияти эркинлиги кафолатлари тушунтирилди. Пойтахт ИИББ жамиятда ўзини тутиш қоидалари ва қонунчиликка итоаткор бўлишга чақирди.
Блогер Олимжон Ҳайдаров митинглар ташкил этиш ва ўтказиш тартибини бузганлик, ёлғон ахборот тарқатганликда айбланиб, 21 млн сўм миқдорида жаримага тортилди. У яқинда Фарғонадаги завод ишчиларининг норозилик намойиши акс этган видеони эълон қилганди, шундан сўнг 7 ишчи ҳибсга олинганди.
Қўшимча имкониятларга эга булиш учун сайтда рўйхатдан ўтинг