Роскомнадзор Telegram мессенжеридан блокларни олиб ташлагани ҳақида хабар берди.
Террористик ва экстремистик маълумотларнинг тарқалиши, болалар порнографияси, ўз жонига қасд қилиш ва гиёҳвандлик воситаларини тарғиб қилишда биз мамлакатда ишлайдиган барча интернет-компаниялар билан ҳамкорлик қилишга тайёрмиз.
Роскомнадзор баёноти
4 июнь куни Telegram мессенжери асосчиси Павел Дуров Россия Давлат Думаси депутатларининг Telegram дан тақиқларни олиб ташлаш ғоясини қўллаб-қувватлади. Унинг сўзларига кўра, Россияда мессенжер айнан терроризмга қарши кураш баҳонасида блокировка қилинган. Аммо икки йил мобайнида компаниянинг ўзи, фойдаланувчилар махфийлигини бузмасдан, экстремизмга қарши курашиб келмоқда.
Агентликнинг баёнотида таъкидланишича, Роскомнадзор Дуровнинг терроризм ва экстремизмга қарши курашишга тайёрлигини «ижобий баҳолайди».
Ҳозирда етакчи Россия ва хорижий интернет-компаниялар билан биргаликда ҳафтасига ўртача 1 300 та террористик ва экстремистик, 300 та вояга етмаганлар иштирокидаги порнографик, 800 та гиёҳвандлик моддаларини тарғиб қилувчи материаллар ўчириб ташланмоқда, дея хабар беради Роскомнадзор агентлиги.
Олдинроқ, «Газета.uz» Telegram мессенжерида хавфсизлик ва махфийлик созламаларини қандай ўрнатиш мумкинлиги ҳақида хабар берган эди.
