2020−2021 ўқув йилидан бошлаб тажриба тариқасида учта олий таълим муассасасида масофавий ўқитиш шакли жорий этилади, дея хабар берди Давлат тест марказининг матбуот хизмати.

Маълум қилинишича, 2020−2021 ўқув йилидан бошлаб Муҳаммад ал-Хоразмий номидаги Тошкент ахборот технологиялари университети, Тошкент давлат юридик университети ва Тошкент давлат педагогика университетида тажриба тариқасида босқичма-босқич масофавий ўқитиш шакли жорий этилиши режалаштирилган.

Хабарга кўра, Ахборот технологиялари ва коммуникацияларини ривожлантириш, Адлия ҳамда Олий ва ўрта махсус таълим вазирликлари томонидан 1 августга қадар масофавий ўқитиш шаклини амалга ошириш тартиби белгиланади, дастурий-аппарат комплекси яратилади ва тегишли ОТМларнинг ўқув жараёнига масофавий ўқитиш платформаси жорий этилади ҳамда зарур бўлган ускуналар билан жиҳозланади.

Бундан ташқари, 1 сентябрга қадар илм-фаннинг ишлаб чиқариш билан фаол интеграциялашувини таъминлаш мақсадида фундаментал ва инновацион тадқиқотлар учун мақсадли грант маблағларини ажратиш механизми тубдан қайта кўриб чиқилиши ҳақида маълум қилинди.