Швеция Қироллигининг бош эпидемиологи Андерс Тегнелл мамлакатда коронавирус эпидемиясининг бошиданоқ қатъий карантин чекловларини ўрнатилмаганидан афсусланишини айтди. Бу ҳақда Bloomberg нашри хабар берди.
Андерс Тегнеллнинг тан олишича, у ҳукуматни Швецияда қатъий карантин чораларини қабул қилмасликка ишонтирган ва умуман унинг COVID-19 га қарши кураш стратегияси мамлакатда жуда кўп ўлимга олиб келган.
«Агарда биз бугун худди шу касалликка дуч келганимизда, ўйлайманки, бизнинг жавобимиз Швеция ҳозир қилаётган ва бошқа давлатлар қилган ишларнинг ўртасида бўларди», — деди Андерс Тегнелл «швед радиоси»га берган интервюсида.
Bloomberg хабарига кўра, Швеция ҳукумати бош эпидемиологнинг фикрига қўшилиб мамлакатда ресторанлар, дўконлар ва мактабларни ёпмаган эди. Шу билан бирга, қарор бир қатор давлатлар томонидан «ҳам мақтовга, ҳам қоралашга сазовор», дея таъриф берилди.
Пандемия бошланганидан буён қатъий карантин чораларини жорий этган қўшни Дания ва Норвегияга нисбатан Швецияда ҳар 100 минг кишига 43 ўлим ҳолатлари қайд этилиб, мамлакатда коронавирусдан ўлим даражаси дунёдаги энг юқори кўрсаткич бўлиб қолмоқда.
Кейинроқ, Андерс Тегнелл «Швед радиосига» берган интерьюсидаги сўзлари нотўғри талқин қилинганини маълум қилди. Унинг сўзларига кўра, гап мамлакат танлаган стратегияси нотўғри бўлганида эмас, балки йўл қўйилган хатолардадир.
«Биз ҳали ҳам стратегия яхши эканлигига ишонамиз, лекин ҳар доим уни янада яхшилаш мумкин, айниқса ортга қараганда», — деди Тегнелл. Хусусан, унинг фикрича, қариялар уйларини яхшироқ тайёрлаш ва тест синовларини ўтказиш қобилиятини ошириш мумкин эди. Шу билан бирга, Тегнелл «кўпроқ иш қилиш кўпроқ зарар етказишни ҳам англатади», — деб таъкидлади.
Маълумот учун, Швецияда коронавирус инфекциясидан ўлим даражаси 11,6 фоизни ташкил этади. Ҳозирда мамлакатда 40 мингдан ортиқ COVID-19 ҳолати қайд этилган бўлиб, бунда 4 971 бемор соғайиб чиққан бўлса, 4 542 нафар киши оламдан кўз юмган.
