Жиноят ишлари бўйича Тошкент шаҳар Юнусобод туман суди ўтган йилнинг ёзида машинасида уч ўсмирни уриб юбориб, улардан бирининг ўлимига сабаб бўлган ҳайдовчи Лариса Толмачева устидан суд жараёни якунига етди. Бу ҳақда Ўзбекистон Олий суди матбуот хизмати раҳбари Азиз Абидов «Газета.uz»га хабар қилди.
Эслатиб ўтамиз, 2019 йил 4 июнь куни Nexia-3 русумли автомобиль ҳайдовчиси Лариса Толмачёва 12 ёшли уч ўсмир — А.Г., И.С. ва Я.С.ни уриб юборган, натижада А.Г. воқеа жойида вафот этган эди.
Мазкур ҳолат юзасидан Юнусобод туман ИИБ томонидан Ўзбекистон Жиноят кодексининг 266-моддаси 2-қисми (транспорт воситалари ҳаракати ёки улардан фойдаланиш хавфсизлиги қоидаларини бузиш одам ўлимига сабаб бўлса) бўйича жиноий иш қўзғатилди. «Газета.uz» дастлабки тергов натижалари ҳамда суд ёпиқ деб эълон қилинмагунча биринчи суд муҳокамаларини ёритган эди.
Элза Шамсутдинова томонидан олиб борилган суд жараёнида судланувчи, гувоҳлар, жабрланувчилар ва уларнинг қонуний вакилларининг кўрсатмалари тингланди, далиллар ўрганилди ва судланувчининг далиллари ўрганилди.
«Суд жиноят ишнинг материалларини ҳар томонлама ва тўла ўрганиб чиқиб, Лариса Толмачевани жиноят содир этишда Ўзбекистон Жиноят кодексининг 266-моддаси 2-қисми (транспорт воситалари ҳаракати ёки улардан фойдаланиш хавфсизлиги қоидаларини бузиш одам ўлимига сабаб бўлса) бўйича айбдор деб топди. Суднинг 2020 йил 18 майдаги ҳукми билан Лариса Толмачевани 3 йил муддатга транспорт воситаларини бошқариш ҳуқуқидан маҳрум қилиш билан 4 йилга озодликдан маҳрум қилди. Суд жазони колонияларда ўташни ва жазо муддатини 2019 йил 6 июндан бошлаб аниқлади», — дейилади Олий суд баёнотида.
Айбдор томон жиноят ишлари бўйича Юнусобод туман судининг ҳукми устидан 10 кун ичида шикоят қилиши ва протест келтириши мумкин.
