Бугун Ўзбекистонда яна об-ҳавонинг нобарқарор бўлиши кутилмоқда, дея хабар қилди Ўзгидромет матбуот хизмати.
Волга бўйи ҳудидан нам ва салқин ҳавонинг кириб келиши натижасида мамлакатнинг Қорақалпоғистон ва Хоразм вилоятидан ташқари, кўпгина ҳудудларида ёмғир ёғади. Айрим жойларга кучли ёмғир ёғиши ва момақалдироқ бўлиши мумкин.
Республика ҳудудидан совуқ атмосфера фронти ўтиши билан шамолнинг тезлиги секундига 15−20 метргача кучайиши кутилмоқда, шамол шиддат билан эсганда унинг тезлиги 23−28 метргача етади. Кундузи ҳаво ҳарорати пасайиб 20−25 даражани ташкил этади.
Эртага республиканинг кўпгина ҳудуларида ёмғир ёғиши тўхтайди, фақат марказий ва шарқий вилоятларда қисқа муддатли момақалдироқли ёмғир ёғиши мумкин. Ҳаво ҳарорати 22−27 даража атрофида бўлади.
20 майдан ва ҳафта охиригача хорижий жанубдан Ўзбекистон ҳудудига кираётган қуруқ ва илиқ ҳаво оқими кун сайин кучаяди. Ниҳоят республикада қуёшли ҳаво кузатилади. Ҳаво ҳарорати аста-секин кўтарилиб, дам олиш кунлари кечаси 17−20 даража, кундузи 32−35 даражага етади, мамлакатимиз шимоли, жанубий ва чўл зоналарида 37 даражагача кўтарилади, бу ўртача кўп йиллик кўрсаткичлардан 6−8 даражага юқоридир.
