АҚШ давлат энергетика департаментининг Миллий ядро хавфсизлиги маъмурияти Ўзбекистон Давлат божхона қўмитасига Афғонистон билан чегарадаги «Ҳайратон» кўпригида радиацияни аниқлаш учун ускуна тақдим этди. Бу ҳақда АҚШнинг Тошкентдаги элчихонаси матбуот хизмати «Газета.uz»га хабар қилди.
Душанба куни бўлиб ўтган ускунани топшириш маросимида АҚШ элчиси Дэниел Розенблюм ва Афғонистон бўйича махсус вакил Исматулла Эргашев иштирок этди.
Радиацияни аниқловчи ушбу ускуна Ўзбекистонга муҳим халқаро чегара пунктида радиоактив материал контрабандасига қарши курашда ёрдам беради, дейилади хабарда. У автомобиль ва йўловчилар, мобил детекцион тизимлар ва қўл/портатив детекторларни сканердан ўтказувчи радиацион портал мониторларни ўз ичига олади.
Элчихонанинг қайд этишича, ускуна кўп йиллик, кўп миллион долларлик лойиҳанинг биринчи фазаси бўлиб, унинг доирасида АҚШ давлат энергетика департаментининг Миллий ядро хавфсизлиги маъмуриятига қарашли Ядро контрабандасини аниқлаш ва ушлаб қолиш идораси бошқа стратегик чегара ўтиш пунктларини ҳам радиацион портал мониторлари билан жиҳозлайди.
