АҚШ президенти Дональд Трамп Жанубий ва Шимолий Корея чегарасидаги қуролсизлантирилган ҳудудда Ким Чен Ин билан учрашди, дея хабар қилди BBC.
Бу жойда икки мамлакат раҳбарлари илк бор учрашмоқда. Дональд Трамп Шимолий Корея ҳудудига қадам босган биринчи АҚШ президенти бўлди.
«Сизни яна бир бор кўрганимдан хурсандман», — деди Дональд Трамп Ким Чен Ин билан учрашувда. Аввалига учрашувнинг қисқа, қўл сиқишиш ва бир оз мулоқот шаклида ўтиши кутилган эди.
Қўл сиқишишдан кейин Дональд Трамп демаркация чизиғини кесиб ўтди ва Шимолий Корея ҳудудига қадам босди. У бир неча қадам ташлади, сўнгра ҳар икки раҳбар яна бир бор қўл сиқишиб, жанубий томондаги қуролсизлантирилган ҳудудга қайтишди.
Журналистлар билан мулоқотда Трамп чегарани рамзий кесиб ўтгани унинг учун улкан шараф эканини таъкидлади.
«Президент Трампнинг ҳозиргина демаркация чизиғини кесиб ўтгани бизга ташриф буюрган биринчи [АҚШ] президентга айлантирди», — деди Ким Чен Ин.
